Sahibkarlıq

Ana səhifə

Sahibkarlıq

Azərbaycanda brilyantlar yeni üsulla qiymətləndiriləcək

21 aprel 2011 09:27 (UTC +04:00)

Standartlaşdırma, Metrologiya və Patent üzrə Dövlət Komitəsi «Brilyantların qiymətləndirilməsi üçün GIA sistemi» metodiki təlimatını təsdiqləyib.

«APA-ECONOMICS»in məlumatına görə, Maliyyə Nazirliyinin Qiymətli Metallara və Qiymətli Daşlara Nəzarət Dövlət Xidməti və Komitənin texniki tənzimləmə və standartlaşdırma şöbəsinin birlikdə hazırladığı bu sənəd bundan sonra ölkədə brilyantların necə qiymətləndiriləcəyini müəyyən edir.

Qeyd edək ki, brilyantların qiymətləndirilməsi üçün GIA sistemi ABŞ-ın Hemologiya İnstitutu (GIA) tərəfindən yaradılıb və dünyada qiymətli daşların qiymətləndirilməsi üçün əsas beynəlxalq standartlardan biri sayılır. GIA isə dünyada brilyant və digər qiymətli daşların yaranması və qiymətləndirilməsi üzrə ən nüfuzlu təşkilatdır. Bu sistemə əsasən brilyantlar 4 parametrə – rəngi, saflığı, taraşlanması (cilalanması) və çəkisinə əsasən qiymətləndirilir.

Məsələn, brilyantların taraşlanması bir neçə səviyyəyə bölünür – ideal, əla, çox yaxşı, yaxşı və nisbətən yaxşı.

Brilyantların saflıq göstəricisi isə almazların həm üzlərində, həm də daxilində çatlar, hava qovcuqları, deffektlər və yad mineral maddələrlə ölçülür. Daşın saflığı lupa altında 10 dəfə böyüdülməklə yoxlanır. Bu standarta əsasən, brilyantlar saflıq dərəcəsinə görə 11 qrupa ayrılır. Heç bir qüsur və əlavələr müəyyən edilməyən «daxili nöqsansız» brilyant, ən saf brilyant sayılır. Adi gözlə belə görünən ciddi qüsuru olan daş isə «qeyri-mükəmməl» brilyant adlanır. Daşın rənginə gəldikdə isə GIA sistemi tamamilə rəngsiz brilyantlardan başlayır və sarı rəngin çalarının artması ilə sarı brilyantadək dəyişir. Rənginə görə ən yaxşı daş rəngsiz brilyant sayılır.

Komitədən «APA-ECONOMICS»ə bildiriblər ki, bundan sonra bazara nəzarət edən orqanlar və digər rəsmi qurumlar brilyantların məhz bu üsulla qiymətləndirilməsini əsas götürəcəklər.