Sahibkarlıq

Ana səhifə

Sahibkarlıq

Azərbaycanda sənaye məhsullarının istehsalı və emalı layihələrinə ayrılan güzəştli kreditlərin həcmi kəskin artıb

22 aprel 2011 08:06 (UTC +04:00)

Bakı. Nicat Mustafayev – APA-Economics. Bu ilin I rübü ərzində Azərbaycan İqtisadi İnkişaf Nazirliyinin Sahibkarlığa Kömək Milli Fondu (SKMF) tərəfindən ölkənin müxtəlif sənaye məhsullarının istehsalı və emalı sahəsində fəaliyyət göstərən iş adamlarına verilən kreditlərin xüsusi çəkisi ötən ilin eyni dövrü ilə müqayisədə 26,5 faiz bəndi artaraq 49,9% təşkil edib.

SKMF-dan «APA-Economics»ə verilən məlumata görə, sözügedən sahədə fəaliyyət göstərən sahibkarlara hesabat dövründə Fond tərəfindən 17 layihənin icrası üçün 13,702 mln. manat məbəlğində vəsait ayrılıb ki, bu da 2010-cu ilin I rübünə nisbətən 3,1 dəfə çoxdur.

Hesabat dövründə kənd təsərrüfatı məhsullarının emalı sahəsində 4 layihənin icrası üçün sahibkarlara 2,3 mln. manat məbəlğində və ya ötən ildəkindən 97,4% çox güzəştli kreditlər verilib. Bu sahəyə ayrılan kreditlərin xüsusi çəkisi ötən ilin yanvar-mart aylarına nisbətən 2,3 faiz bəndi artaraq 8,4% təşkil edib.

Kənd təsərrüfatı məhsullarının istehsalı sahəsinə gəldikdə isə, bu sahədə 306 layihənin icrasına 9,052 mln. manat həcmində kreditlər verilib və bu sahəyə ayrılan güzəştli vəsaitin həcmi ötən ilə nisbətən 3,7 dəfə artıb, kreditlərin xüsusi çəkisi isə 20,3 faiz bəndi artaraq 33%-ə çatıb.

Cari ilin yanvar-mart aylarında həmçinin, xidmət (infrastruktur) sahələrinin inkişafına da güzəştdi kreditlər ayrılıb. Kreditlərin ümumi həcmi 2,404 mln. manat, onların xüsusi çəkisi isə 8,8% təşkil edib. Hesabat dövründə sözügedən sahədə 5 layihənin icrası üçün ayrılan kreditlərin həcmi 4,2 dəfə, onların xüsusi çəkisi isə 48,9 faiz bəndi azalıb.

Qeyd edək ki, 2011-ci ilin I rübü ərzində SKMF tərəfindən 332 layihənin icrası üçün 27,5 mln. manat məbləğində güzəştli kredit ayrılıb. Kreditlərin ümumi həcmi 44,3%, sayı isə 68,5% artıb. Hesabat dövründə 307 kiçik həcmli layihə, 8 böyük həcmli layihə, 17 iri həcmli layihə maliyyələşdirilib. Ayrılan kreditlər hesabına 1 676 yeni iş yerinin yaradılması nəzərdə tutulur.