Sahibkarlıq

Ana səhifə

Sahibkarlıq

Sahibkarlığa Kömək Milli Fondu 19 nardaranlı sahibkara kredit ayırıb

22 aprel 2011 12:21 (UTC +04:00)

Bakı. Nicat Mustafayev - APA-Economics. Bu gün Azərbaycan İqtisadi İnkişaf Nazirliyinin Sahibkarlığa Kömək Milli Fondu (SKMF) «Bakı qəsəbələrində sahibkarlığın inkişafına dövlət dəstəyi» mövzusunda Bakıxanov qəsəbəsində tədbir keçirib.

«APA-Economics»in məlumatına görə, tədbirdə Sabunçu rayonunun qəsəbələrində fəaliyyət göstərən 150-dək sahibkar iştirak edib.

Tədbirdə çıxış edən İqtisadi İnkişaf Nazirliyinin Sahibkarlığın inkişafı siyasəti şöbəsinin müdiri Zaur Qasımov hazırda ölkənin sosial-iqtisadi inkişafa nail olduğunu, qeyri-neft sektorunun inkişafının sürətləndiyini, əhalinin həyat səviyyəsinin daha da yaxşılaşdığını qeyd edib, sahibkarlığın inkişafına dövlət dəstəyi nəticəsində iqtisadiyyatda özəl bölmənin rolunun daha da artdığını vurğulayıb, kiçik və orta sahibkarlığın inkişaf etdirilməsi üçün görülən işlər barədə məlumat verib.

İqtisadi İnkişaf Nazirliyinin Regionların inkişafı və dövlət proqramları şöbəsinin müdiri Sahib Məmmədov çıxışında məqsədli dövlət proqramlarında Bakı şəhərini və qəsəbələrini əhatə edən tədbirlər və onların icrası, həmçinin görüləcək işlər barədə danışıb.

Öz növbəsində tədbirdə çıxış edən SKMF-ın icraçı direktoru Şirzad Abdullayev bildirib ki, Fondun güzəştli kreditləri hesabına Sabunçu rayonunda fəaliyyət göstərən sahibkarların zeytunçuluq, zəfərançılıq təsərrüfatlarının, zəfəran emalı və qablaşdırılması müəssisəsinin, müasir istixana komplekslərinin, müasir çörək istehsalı müəssisəsinin, quşçuluq və kiçik həcmli müasir ət kəsimi müəssisələrinin yaradılması, intensiv üzümçülüyün inkişafı layihələrinin reallaşdırılması nəzərdə tutulur. Ş.Abdullayev Fondun fəaliyyəti, güzəştli kreditlər hesabına həyata keçirilən və müasir texnologiyaların tətbiqinə əsaslanan layihələr barədə də tədbir iştirakçılarına ətraflı məlumat verib.

Tədbir çərçivəsində müvəkkil kredit təşkilatları vasitəsilə Sabunçu rayonunun qəsəbələrində fəaliyyət göstərən 26 sahibkarlıq subyektinə, o cümlədən 19 Nardaran sahibkarına, 290 min manat güzəştli kredit vəsaiti verilib. Bu kreditlər hesabına 50-dən çox yeni iş yerinin yaradılması nəzərdə tutulur.