Sahibkarlıq

Ana səhifə

Sahibkarlıq

Ağcabədidə “Regionlarda sahibkarlığın inkişafına dövlət dəstəyi” tədbiri keçirilib

29 aprel 2011 11:42 (UTC +04:00)

Bakı - APA-Economics. İqtisadi İnkişaf Nazirliyinin (İİN) Sahibkarlığa Kömək Milli Fondu (SKMF) Ağcabədi rayonunda “Regionlarda sahibkarlığın inkişafına dövlət dəstəyi” mövzusunda tədbir keçirib. Nazirlikdən “APA-Economics”ə verilən məlumata görə, tədbirdə Aran iqtisadi rayonunda fəaliyyət göstərən 180-dək sahibkar iştirak edib.

Tədbirdən əvvəl əsas hissəsi SKMF-ın güzəştli kreditləri hesabına maliyyələşdirilmiş Ağcabədi rayonundakı “Atropatena LTD” QSC-nin illik istehsal gücü 90 min ton olan süd emalı müəssisəsində aparılan son tamamlama işlərinə, “Aqro-MTS” MMC-nin illik istehsal gücü 15,8 min ton ət emalı olan ət kəsimi müəssisəsində aparılan tikinti işlərinə, sahibkar Ramil Abdullayevə məxsus tutumu 5 min ton olan müasir taxıl anbarı kompleksinin fəaliyyətinə baxış keçirilib.

Tədbirdə sahibkarlar üçün güzəştli kreditlərdən istifadə mexanizmi, investisiya layihələrinin hazırlanmasına dair treninq keçirilmiş, SKMF-ın internet saytı (www.anfes.gov.az) barədə tədbir iştirakçılarına ətraflı məlumat verilmiş, sahibkarlara metodiki materiallar paylanıb.

Tədbirdə Ağcabədi rayonunun iqtisadi potensialına uyğun olaraq intensiv meyvəçilik (intensiv nar bağlarının salınması) və müasir tələblərə cavab verən ətlik və yumurtalıq istiqamətli quşçuluq təsərrüfatlarının yaradılması üzrə nümunəvi investisiya layihələrinin təqdimatı keçirilib.

Ağcabədi Rayon İcra Hakimiyyəti başçısının müavini Cəlal İsgəndərov dövlət başçısının regionların inkişafına göstərdiyi xüsusi diqqət və qayğı nəticəsində məşğulluq səviyyəsinin artdığını, sahibkarlıq fəaliyyətinin genişləndiyini, həmçinin rayon üçün ənənəvi olan kənd təsərrüfatı sahələrinin daha da inkişaf etdiyini bildirib.

İİN-in Sahibkarlığın inkişafı siyasəti şöbəsinin müdir müavini Hüseyn Paşayev ölkədə həyata keçirilən məqsədli dövlət proqramlarının regionların inkişafında xüsusi əhəmiyyətini qeyd edib.

İİN-in Aran regional bölməsinin müdiri Elbrus Hüseynov məqsədli dövlət proqramlarında nəzərdə tutulmuş tədbirlərin həyata keçirilməsi istiqamətində Ağcabədi rayonunda görülmüş və görüləcək işlər barədə məlumat verib.

SKMF-ın icraçı direktoru Şirzad Abdullayev Fondun fəaliyyəti, güzəştli kreditlər hesabına bölgələrdə, o cümlədən Aran iqtisadi rayonunda həyata keçirilən layihələr barədə tədbir iştirakçılarını bilgiləndirib. Onun sözlərinə görə, SKMF müvəkkil kredit təşkilatları vasitəsilə 2011-ci ilin ötən dövrü ərzində ümumilikdə sahibkarlıq subyektlərinin 494 investisiya layihəsinin maliyyələşdirilməsinə 38 mln. manat güzəştli kredit verib. Ş.Abdullayev 2011-ci ildə Fondun güzəştli kredit vəsaitlərinin yönəldiləcəyi əsas sahələr barədə tədbir iştirakçılarını məlumatlandırıb, sahibkarları maraqlandıran sualları cavablandırıb.

Sonra müvəkkil kredit təşkilatları vasitəsilə Ağcabədi və ətraf rayonlarda fəaliyyət göstərən 32 sahibkarlıq subyektinə 387 min manat güzəştli kredit vəsaiti verilib. Bu kreditlər hesabına 60 yeni iş yerinin yaradılması nəzərdə tutulur.

Tədbirdə rayonun yerli icra hakimiyyəti nümayəndələri və iş adamlarının iştirakı ilə Ağcabədidə sahibkarlığın gələcək inkişaf perspektivləri, güzəştli kreditlərin istifadəsində region iqtisadiyyatı üçün prioritet hesab olunan sahələr barədə müzakirələr aparılıb.