Sahibkarlıq

Ana səhifə

Sahibkarlıq

Azərbaycanda bizneslə bağlı bütün yoxlamalar Vahid Yoxlama Reyestrində qeydə alınacaq

02 may 2011 12:11 (UTC +04:00)

Bakı. Əli Əhmədov – APA-Economics. Mayın 1-dən Azərbaycanda fəaliyyətə başlayan Yoxlamaların Vahid Məlumat Reyestri biznesin üzərinə düşən inzibati yükün azaldılmasını və dövlət nəzarət sahəsində şəffaflığı təmin edəcək. Bu barədə «APA-Economics»ə Beynəlxalq Maliyyə Korporasiyasından (IFC) məlumat verilib.

IFC-dən bildirilib ki, yoxlamaların vahid reyestrinin fəaliyyətə başlaması sahibkarların dövlət tərəfindən qoyulan tələblərə riayət etmələrinə, biznesin üzərinə düşən inzibati yükün azaldılmasına və cəmiyyət üçün müsbət nəticələrin əldə olunmasına kömək edəcək və dövlət nəzarət sahəsində şəffaflığı təmin edəcək mühüm inzibati islahatdır.

Belə ki, sahibkarlıq subyektlərinə, habelə müəssisələrə istənilən dövlət orqanı tərəfindən edilən bütün ziyarətlər, yəni yoxlama, reyd, nəzarət, baxış və s. ziyarətlər reyestrdə qeydə alınmalıdır. Mayın 1-dən etibarən, ancaq reyestrdə qeydiyyata salınan yoxlamalar qanuni hesab ediləcək. Reyestrdə qeydiyyata salınmayan yoxlamalar və ya digər ziyarətlərə görə yoxlayıcı orqan qanunvericiliyin tələblərinin pozulması ilə əlaqədar məsuliyyət daşıyacaq.

«Yoxlamalar Reyestri nəzarət orqanları və sahibkarlıq subyektləri arasındakı münasibətlərdə şəffaflığın artırılması və yoxlama nəticələrinin qabaqcadan proqnozlaşdırılmasına dəstək verərək investisiya mühitini daha da yaxşılaşdıracaq», - deyə IFC-nin Bakı ofisindən bildirilib.

Reyestrin fəaliyyətinin qənaətbəxş olması üçün sahibkarların da bu prosesdə iştirakı vacibdir. Belə ki, sahibkarlar nəzarət məqsədi ilə müəssisəyə gələn nəzarətçi və müfəttişlərdən ziyarətin reyestrdə qeydiyyatına dair Ədliyyə Nazirliyinin təsdiq etdiyi müvafiq reyestr çıxarışının təqdim olunmasını tələb etməlidir. Qanunvericiliyin tələblərinə əsasən, yoxlamalar ancaq reyestr çıxarışı təqdim edildikdən sonra aparıla bilər.

Qeyd edək ki, Azərbaycan ərazisində fəaliyyət göstərən sahibkarlıq subyektləri və müəssisələrinə dair nəzarət edici orqanların hazırladıqları yoxlama planları, habelə reyestrə dair ətraflı məlumat Yoxlamaların Vahid Reyestrinin elektron səhifəsində (www.yoxlama.gov.az) əksini tapıb.

Xatırladaq ki, Azərbaycan prezidentinin «Sahibkarlıq sahəsində aparılan yoxlamaların vahid məlumat reyestrinin forması və aparılması qaydası haqqında Əsasnamə»nin təsdiqi ilə bağlı 15 fevral 2011-ci il tarixli fərmanına əsasən, hazırlanan Yoxlamaların Vahid Reyestrinin yaradılması və fəaliyyətinə nəzarət Ədliyyə Nazirliyinə həvalə edilib. IFC Reyestrin yaradılması prosesində bir başa olaraq Nazirliklə əməkdaşlıq edib.

Korporasiya bəyan edir ki, reyestrin yaradılması yoxlamalar sisteminin səmərəliliyinin artırılmasında əhəmiyyətli bir addımdır: «IFC-nin Azərbaycanda İnvestisiya mühiti üzrə məsləhət xidmətləri Layihəsi istər reyestrin yaradılması, istərsə də onun gələcəkdə təkmilləşdirilməsi istiqamətlində Ədliyyə Nazirliyi ilə uğurlu əməkdaşlıq əlaqələri qurub. Layihə tərəfindən reyestrin yaradılması işində birbaşa iştirak edən nazirliyin mütəxəssislərinə, dünyanın müxtəlif ölkələrində olan qabaqcıl reyestr nümunələri və təcrübə mübadiləsi dəstəyi göstərilib».