Sahibkarlıq

Ana səhifə

Sahibkarlıq

Prezident İlham Əliyev İmişlidə «Azersun» şirkətinin kəllə qənd zavodunun təməlqoyma mərasimində iştirak edib

06 may 2011 09:41 (UTC +04:00)

Bakı. Nicat Mustafayev - APA-Economics. Azərbaycan prezidenti İlham Əliyev İmişlidə «Azersun» şirkətinin müəssisələri ilə tanış olub, yem fabrikinin açılışında, kəllə qənd zavodunun təməlqoyma mərasimində iştirak edib.

Prezidentin mətbuat xidmətindən «APA-Economics»ə verilən məlumata görə, dövlət başçısı əvvəlcə «Green Land» yem fabrikinin açılışında iştirak edib.

Bu yem fabriki dövlətin güzəştli krediti və «Azersun»un vəsaiti hesabına inşa olunub. İlham Əliyev fabrikdə istehsal olunan hazır yem məhsullarına baxıb. Qeyd edilib ki, təqribən bir hektar ərazisi olan fabrikdə qaramal və davar, eləcə də broyler və yumurtalıq quş yemləri istehsal olunacaq. Daha sonra prezident fabrikin idarəetmə mərkəzindən istehsal prosesini izləyib. Fabriklə tanış olan ölkə başçısının diqqətinə çatdırılıb ki, 80 nəfərin işlə təmin olunduğu müəssisənin illik istehsal gücü 150 min tondur. Burada altı xam maddə, bir hazır məhsul anbarı da mövcuddur.

Dövlət başçısı həmçinin «Azersun» şirkətinin bitki yağları fabriki ilə də tanış olub. Bildirilib ki, müəssisə 1,2 hektar ərazini əhatə edir. Prezident İ.Əliyev fabrikdə istehsal prosesini izləyib. Qeyd olunub ki, müəssisədə quraşdırılmış avadanlıqlar ən müasir standartlara cavab verir.

İ.Əliyev fabrikdə istehsal olunan məhsulların nümunələrinə də baxıb. Məlumat verilib ki, müəssisədə həm xam bitki yağları, həm də günəbaxan cecəsi və soya jımıxı hazırlanacaq. İllik istehsal gücü 60 min ton olan fabrikdə 80 nəfər işlə təmin edilib. Müəssisədə Azərbaycanda ən böyük üç saxlama anbarı yaradılıb. Anbarın quraşdırılmasında Sahibkarlığa Kömək Milli Fonduna müraciət olunub və dövlətin güzəştli kreditlərindən istifadə edilib.

Sonra prezident müəssisədə yağın alınması prosesinin son mərhələsini izləyib. Dövlət başçısı xam şəkər saxlanılacaq anbarla da tanış olub. Bildirilib ki, anbarda 40 min ton xammal saxlamaq mümkündür.

İ.Əliyev qurutma sexində iş prosesini izləyib. Qeyd edilib ki, burada yüksək keyfiyyətli çuğundur cecəsi, həmçinin qarışıq yem hazırlanır. İllik istehsal gücü 15 min ton olan sexdə 30 nəfər işlə təmin edilib.

Dövlət başçısı kəllə qənd zavodunun təməlqoyma mərasimində də iştirak edib. Zavodun sxemi ilə tanış olan prezidentə məlumat verilib ki, müəssisənin tikintisi üçün 7,5 hektar torpaq sahəsi ayrılıb. İllik istehsal gücü 60 min ton olan müəssisədə müxtəlif çeşiddə kəllə qənd hazırlanacaq.