Sahibkarlıq

Ana səhifə

Sahibkarlıq

Parisdə “Qafqaz və Mərkəzi Asiya” mövzusunda simpozium keçirilib

14 may 2011 13:53 (UTC +04:00)

Bakı - APA. Parisdə “Qafqaz və Mərkəzi Asiya” mövzusunda simpozium keçirilib. Azərbaycan İqtisadi İnkişaf Nazirliyindən APA-ya verilən məlumata görə, Fransa Senatında təşkil edilmiş tədbirdə Fransa Şirkətlər Hərəkatı, Beynəlxalq Ticarətin İnkişafı Agentliyi (“UbiFrance”), Beynəlxalq İnvestisiyalar üzrə Fransa Agentliyi və Fransa Ticarət Palatası ilə yanaşı, Azərbaycanda İxracın və İnvestisiyaların Təşviqi Fondunun (AZPROMO) və Azərbaycanın Fransadakı səfirliyinin nümayəndələri də iştirak edib.

Simpoziumda çıxış edən Fransa Senatının sədri Jerar Larşe Azərbaycanın Mərkəzi Asiya və Şimali Qafqaz regionunda aparıcı ölkələrdən olduğunu, “UbiFrance”ın fəaliyyəti barədə məlumat verən qurumun rəhbəri Alan Kuzin isə belə tədbirlərin Mərkəzi Asiya və Qafqaz ölkələrində keçirilməsinin zəruriliyini vurğulayıblar.

Tədbirdə AZPROMO-nun prezidenti Adil Məmmədov Azərbaycanın qazandığı iqtisadi uğurlar, ölkədə yaradılmış əlverişli biznes mühiti, investisiya və ixrac imkanları barədə təqdimatla çıxış edib.

“Qafqaz və Mərkəzi Asiya bazarlarına necə girmək olar?” mövzusunda keçirilmiş dəyirmi masada AZPROMO-nun nümayəndəsi Azərbaycanın qeyri-neft sektoru, vergi sistemi, investisiya potensialı ilə bağlı sualları cavablandırmışdır.

Tədbirdə Fransanın Azərbaycandakı Ticarət Departamenti və Azərbaycanda fəaliyyət göstərən “Salans” hüquq şirkəti tərəfindən Azərbaycanın biznes mühiti və ölkədə fəaliyyət göstərən xarici şirkətlərə yaradılmış imkanlar barədə məlumat verilib.

Tədbir çərçivəsində AZPROMO və Fransa Şirkətlər Hərəkatı arasında Anlaşma Memorandumu imzalanıb.

Səfər çərçivəsində AZPROMO-nun nümayəndələri Fransanın İnvestisiyaların Təşviqi Agentliyinin (“Invest in France”) rəhbərliyi ilə də görüşüb.