Sahibkarlıq

Ana səhifə

Sahibkarlıq

Apreldə Bakıda kommersiya obyektləri bahalaşıb, kirayə haqları artıb

16 may 2011 07:57 (UTC +04:00)

Bakı. Əli Əhmədov - APA-Economics. Aprel ayında Bakının ilkin (yeni tikililər) bazarında mənzillərin 1 kv. metrinin qiyməti 1,3% artıb. «MBA konsaltinq» şirkətindən “APA-Economics”ə verilən məlumata görə, qiymətlər 815 dollardan 826 dollara yüksəlib.

İlin əvvəlindən indiyədək yeni tikililər 0,2%, son bir ildə isə 1,5% bahalaşıb. Əvəzində apreldə təkrar (köhnə binalar) bazarda mənzillərin qiyməti 1,8% ucuzlaşıb. Ötən ay qiymətlər 1320 dollardan 1296-ya enib. Təkrar bazarda ilin əvvəlindən azalma da 1,8%, son bir ildə azalma isə 2,6% təşkil edir.

Aprel ayında torpaq sahələrinin qiyməti 0,3% artaraq 1 sot (100 kv. metr) üçün 18 454 dollardan 18 510 dollara qalxıb. İlin əvvəlindən torpaqlar 6,5%, son bir ildə isə 10,8% bahalaşıb. Mütəxəssislərin sözlərinə görə, torpaqların qiymətində müşahidə olunan artım satışda bahalaşma torpaqların payının artması hesabına baş verib.

Aprel ayında kommersiya obyektləri 3% bahalaşıb. Bakı şəhərində kommersiya obyektlərinin 1 kv. metrinin orta qiyməti 3111 dollardan 3203 dollara qalxıb. Bununla yanaşı, hətta indiki artımdan sonra da kommersiya obyektləri ilin əvvəlindəkinə nisbətən 3,9%, bir il əvvələ nisbətən isə 3,5% ucuzdur.

«MBA konsaltinq» şirkətinin rəhbəri Nüsrət İbrahimov hesab edir ki, aprel ayındakı bahalaşmanı mövsümü amillərlə bağlıdır. Bundan başqa, bazarda indiyədək satışda olan ucuz obyektlərin hamısının satılması, yeni daxil olanların isə bahalı obyektlər olması da orta qiymətin artmasına səbəb olub. Əvəzində kommersiya obyektlərinin icarə qiymətləri ucuzlaşmaqdadır. Apreldə icarə haqları 5,1% aşağı düşərək, obyektlərin 1 kv. metri üçün 19,4 dollar təşkil edib (martda 20,4 dollar idi). İlin əvvəlindən indiyədək icarə haqları 6,1%, son bir ildə 8,3% azalıb.

İcarə qiymətlərindən fərqli olaraq, evlərin kirayə haqlarında artım var. Apreldə orta aylıq kirayə qiyməti 2% artaraq 663 dollardan 676 dollara qalxıb. Mütəxəssislər mövsümi amillərə ziddi sayırlar: «Adətən ilin bu dövründə - təhsil mövsümünün sonuna yaxın kirayə haqları aşağı düşürdü». Bununla yanaşı, ekspertlərin fikrincə, kirayə haqlarının bahalaşması bazardakı dəyişikliklərlə əlaqədardır - istifadəçilər ucuz qiymətə kirayəyə verilən evlərə köçdükləri üçün təklifdə bahalı mənzillərin çəkisi artıb ki, bu da orta qiymətə təsir edib. Ümumilikdə ilin əvvəlindən indiyədək kirayə haqları 0,1% artıb, son bir ildə isə 2% aşağı düşüb.