Sahibkarlıq

Ana səhifə

Sahibkarlıq

Bakıda “Dövlətin daşınmaz əmlakının idarə edilməsi: Almaniya təcrübəsi” mövzusunda seminar keçirilib

18 may 2011 10:41 (UTC +04:00)

Bakı. Elnur Hüseynquluyev - APA-Economics. Bu gün Əmlak Məsələləri Dövlət Komitəsində (ƏMDK) «Dövlətin daşınmaz əmlakının idarə edilməsi: Almaniya təcrübəsi» mövzusunda seminar keçirilib.

Komitədən «APA-Economics»ə verilən məlumata görə, tədbirə Almaniya Texniki Əməkdaşlıq Cəmiyyətinin (GTZ) layihə rəhbəri Vulf Şmider və Almaniyanın Daşınmaz Əmlak üzrə Federal Agentliyinin Səhmlərin İdarə Olunması Departamentinin direktoru Manfred Lange xarici ekspertlər kimi dəvət olublar.

Seminarda ƏMDK-nın sədr müavini Rüstəm Şahbazov son illər qeyri-neft sektorunun və regionların davamlı inkişafı, əhalinin rifah halının artırılması ilə bağlı sosialyönümlü tədbirlərin reallaşdırılması istiqamətlərində önəmli layihələrin həyata keçirildiyini bildirib. Onun sözlərinə görə, bu sahədə komitə tərəfindən bir sıra tədbirlər görülür, beynəlxalq təcrübənin öyrənilməsinə xüsusi diqqət yetirilir. GTZ-nin layihəsi ilə yanaşı, komitə tərəfindən Dünya Bankının maliyyə dəstəyi ilə «Daşınmaz əmlakın qeydiyyatı», Almaniya İnkişaf Bankının (KfW) maliyyə dəstəyi ilə «Kadastr və daşınmaz əmlakın qeydiyyatı», Norveçin Xəritəçəkmə və Kadastr Agentliyinin (Statens Kartverk) dəstəyi ilə «Azərbaycanda ünvan reyestrinin informasiya sisteminin yaradılması» layihələri uğurla həyata keçirilir.

Tədbirdə bildirilib ki, GTZ ilə əməkdaşlıq çərçivəsində bu günədək komitə əməkdaşları üçün Bakı və ölkənin digər şəhər və rayonlarında 20 seminar keçirilib. Bu tədbirlərdə özəlləşdirmə metodları və alətləri üzrə beynəlxalq təcrübə, özəlləşdirmə layihələrinin idarə olunması, müəssisələrin restrukturizasiyası təcrübəsi, dövlət əmlakın icarəyə verilməsi, daşınmaz əmlakın kadastrı və qeydiyyatı və digər mövzuları əhatə edib.

Seminarda V.Şmider və M.Lange Avropa ölkələrində və xüsusən Almaniyada dövlətin daşınmaz əmlakının qeydiyyatı, daşınmaz əmlakın icarəyə və subicarəyə verilməsi, icarə haqlarının müəyyən edilməsi təcrübəsindən danışıblar.

Tədbirdə müvafiq təcrübələrin Azərbaycanda tətbiq edilməsi imkanları barədə fikir mübadiləsi aparılıb və sonda iştirakçılara sertifikatlar verilib.