Sahibkarlıq

Ana səhifə

Sahibkarlıq

Azərbaycanda kiçik və orta şirkətlərin səhmləri ayrıca satılacaq

18 may 2011 12:12 (UTC +04:00)

Bakı. Əli Əhmədov - APA-Economics. Azərbaycanda kiçik və orta sahibkarlığın kapital bazarlarından maliyyələşməsi imkanlarının artırılması məqsədilə Bakı Fond Birjasında alternativ ticarət platformasının yaradılması nəzərdə tutulur. Bu, «2011-2020-ci illərdə Azərbaycan Respublikasında qiymətli kağızlar bazarının inkişafı» Dövlət Proqramında nəzərdə tutulur.

Qiymətli Kağızlar üzrə Dövlət Komitəsindən «APA-Economics»ə verilən məlumata görə, kiçik və orta ölçülü şirkətlər üçün alternativ birja ticarəti platforması - fond birjasının listinq tələblərinə öz ölçüsü və məhdud imkanlarına görə cavab verməyən kiçik və orta müəssisələr üçün nəzərdə tutulur.

Şirkətlər bu platforma vasitəsilə mütəşəkkil kapital bazarına çıxmaq və kapitala tələbatını ödəmək imkanı əldə edirlər. Belə ki, kiçik və orta şirkətlər bu platforma vasitəsilə kapital bazarından həm ucuz və əlverişli şərtlərlə kapital cəlb etmək, həm də öz şirkətləri haqqında geniş investor kütləsinə məlumat verə bilmək imkanı qazanırlar.

Öz növbəsində kiçik və orta ölçülü şirkətlərin qiymətli kağızlarının bu platforma vasitəsilə ticarəti investorların bu şirkətlərə inam və marağını da artırır. Belə şirkətlərin qiymətli kağızlarının mütəşəkkil kapital bazarına çıxması bazarda investisiya imkanlarını da artırır ki, bu da öz növbəsində kapital qoyuluşlarını daha da şaxələndirməyə (diversifikasiya etməyə) imkan yaradır.