Sahibkarlıq

Ana səhifə

Sahibkarlıq

Apreldə Bakının ilkin mənzil bazarında aktivlik azalıb

23 may 2011 15:27 (UTC +04:00)

Bakı. Elnur Hüseynquluyev - APA-Economics. Bu ilin aprel ayı ərzində «Əmlak Bazarı İştirakçıları» İctimai Birliyi tərəfindən paytaxtın ilkin mənzil bazarında aparılan araşdırmalar zamanı ötən ayla müqayisədə alqı-satqı prosesində aktivliyin azalması müşahidə edilib.

«Əmlak Bazarı İştirakçıları» İB-dən «APA-Economics»ə verilən məlumata görə, nisbi də olsa, baş verən bu aktivlik əsasən artıq yaşayış olan, ekonom tipli, mərkəzdən kənar ərazilərdəki yeni tikililərdə qeydə alınıb. Aktiv bazar iştirakçıları olan rieltorlar yalnız ilkin mənzil bazarının deyil, ümumilikdə daşınmaz əmlak bazarında aktivliyin sentyabr-oktyabr aylarında başlayacağını bildiriblər.

Sənədləşmə probleminin bu seqmenti ipoteka bazarından kənarda saxlaması hələ də yeni tikililərə tələbatın təkrar bazara nisbətən zəif olmasına səbəb olur. Bazara təsir edən digər faktorlar kimi yeni tikililərin hələ də real bazar dəyərindən yüksək olmasını, təhvil verilmə müddətinin gecikdirilməsini və digər sosial, kommunal problemləri göstərmək olar. Beləliklə, aprel ayında araşdırmalar zamanı Xətai rayonunda yalnız bir binanın satışdan çıxması müşahidə edilib, paytaxt üzrə yeni tikililərin sayı əvvəlki ayda qeydə alınan 438-ə qarşı 437 ədəd olub. Tikinti şirkətlərinin sayında da heç bir dəyişiklik baş verməyib və ötən aydakı kimi 155 ədəd olaraq qalıb.

Aprel ayında ilkin mənzil bazarında aparılan qiymət monitorinqinin nəticələrinə görə, paytaxt üzrə satış üçün təklif olunmuş mənzillərin orta qiymətində heç bir dəyişiklik baş verməyib, qiymətlər stabil qalaraq ötən aydakı kimi 1kv. metr üzrə 841 manat təşkil edib. Qiymət siyasətində kredit şərtlərinin yumşaldılması, başqa sözlə desək, kredit müddətinin vaxtının uzadılması və ilkin ödəniş faizlərinin aşağı düşməsi halları müşahidə edilib. Araşdırmalara əsaslanaraq qeyd etmək olar ki, alıcı kütləsi hazırda da 1 kv. metri 500-600 manat arasında dəyişən yeni tikililərə üstünlük verməkdədir.

Aprel ayında orta qiymətlər mart ayı ilə müqayisədə dəyişməyərək stabil qalaraq 1 kv. metr üzrə 848 manat təşkil edib. Rübün və ilin əvvəli ilə müqayisədə fərq göstəricisi 0,8% olaraq qalıb. Ötən ilin müvafiq dövrü ilə müqayisədə qiymət azalması 3,4% təşkil edib. İqtisadi böhranın ilk dövrləri ilə müqayisədə (2008, sentyabr) bu göstəricidə 29,6% azalma qeydə alınıb.