Sahibkarlıq

Ana səhifə

Sahibkarlıq

Bakıda Azərbaycan-Niderland işgüzar görüşü keçirilib

24 may 2011 12:09 (UTC +04:00)

Bakı. Əli Əhmədov - APA-Economics. Mayın 24-də Bakı Biznes Mərkəzində İqtisadi İnkişaf Nazirliyinin dəstəyi, Azərbaycanda İxracın və İnvestisiyaların Təşviqi Fondunun (Azpromo) təşkilatçılığı ilə Azərbaycan-Niderland işgüzar görüşü keçirilib.

«APA-Economics»in məlumatına görə, Niderlandın kənd təsərrüfatı şirkətlərindən ibarət ticarət missiyasının Azərbaycana səfəri çərçivəsində keçirilən tədbirdə Azərbaycan və Niderland tərəfdən rəsmi şəxslərlə yanaşı, kənd təsərrüfatı və qida sənayesi sahələrini təmsil edən 80-ə yaxın iş adamı iştirak edib.

Tədbirdə çıxış edən Azpromo-nun prezidenti Adil Məmmədov iki ölkə arasında mövcud iqtisadi əlaqələr və əməkdaşlığın daha da inkişaf etdirilməsi imkanları barədə məlumat verib, əlaqələrin inkişafında biznes-forumların, işgüzar görüşlərin keçirilməsinin əhəmiyyətini qeyd edib. Bildirilib ki, Azərbaycanın kənd təsərrüfatı və ərzaq sənayesi sektorlarında investisiya qoyuluşu üçün geniş imkanlar var və Niderlanddan olan iş adamları ölkəmizdə yaradılmış əlverişli biznes mühitindən yararlanmaqla fəaliyyətlərini genişləndirə və yeni biznes qura bilərlər.

Niderland Krallığının Azərbaycandakı səfiri Aryen Uyterlind iki ölkə arasında mövcud əlaqələr barədə məlumat verib, Niderland və Azərbaycan arasında iqtisadi əlaqələrin genişlənməsində iş adamları arasındakı əməkdaşlığın əhəmiyyətli olduğunu vurğulayıb.

Azərbaycan İnvestisiya Şirkətinin icraçı direktoru Əfqan İsayev rəhbərlik etdiyi qurumun fəaliyyəti və həyata keçirilən layihələr, Niderland ticarət missiyasının rəhbəri, “The Friesian” süd məhsulları istehsalı şirkətinin baş direktoru Sibren van der Zvaaq isə missiyanın məqsədi və nümayəndə heyətinə daxil olan şirkətlər barədə danışıb. Tədbir çərçivəsində həmçinin Niderland şirkətlərinin təqdimatı və iş adamları arasında ikitərəfli görüşlər keçirilib.

Səfər çərçivəsində Niderland ticarət missiyası bir sıra Azərbaycan şirkətləri və “WorldFood Azerbaijan 2011” 17-ci Azərbaycan Beynəlxalq Qida Sənayesi Sərgisi ilə tanış olacaqlar.