Sahibkarlıq

Ana səhifə

Sahibkarlıq

Türkiyə investorları Azərbaycanın emal sənayesinə maraq göstərir

25 may 2011 12:25 (UTC +04:00)

Bakı. Elnur Hüseynquluyev - APA-Economics. Türk iş adamları Azərbaycanın plastik və tekstil sektoruna investisiya yatırmaq niyyətindədirlər. Bunu “APA-Economics”ə açıqlamasında BSW (Bag Solutions Worldwide) Avstriya-Almaniya şirkətinin konsultant xidmətləri üzrə direktoru Turan İlhan bildirib.

T.İlhanın sözlərinə görə, bir qrup türk iş adamları Azərbaycanın plastik və tekstil sektoru ilə daha dərindən maraqlanır və bu sahəyə investisiya yatırmaq niyyətindədirlər. Həmin iş adamları Azərbaycandakı ortaqları ilə razılaşaraq bu ölkədə bütün məhsullar (şəkər, gübrə, un və s.) üçün nəzərdə tutulan kisələr istehsal edən avadanlıqlar quraşdırmaq niyyətindədirlər.

T.İlhan bildirib ki, artıq BSW Avstriya-Almaniya şirkətinə belə müraciətlər daxil olub və bu istiqamətdə müvafiq işlər davam etdirilir. Türk iş adamları Azərbaycanda bu sektoru inkişaf etdirməklə daxili bazarı təmin etmək, eyni zamanda məhsullarının ixracı barədə (Rusiya, Gürcüstan və s. ölkələr) də düşünürlər.

T.İlhan qeyd edib ki, BSW (Bag Solutions Worldwide) Avstriya-Almaniya şirkətinin kisə istehsal edən avadanlığından Azərbaycanda yalnız bir şirkət - «Ram Limited» şirkəti istifadə edir: «Bu şirkət daxili bazarı təmin etməklə yanaşı, məhsullarının ixracını da təşkil edib. Bu kompleks avadanlığın qiyməti təxminən 6,5 mln. avrodur. Qurğu 1 dəqiqədə 8 kisə, ildə isə 60 mln. kisə istehsal edir».