Sahibkarlıq

Ana səhifə

Sahibkarlıq

270 litr sərinləşdirici içki satışdan çıxarılıb

26 may 2011 12:50 (UTC +04:00)

Bakı - APA-Economics. Azərbaycanda sərinləşdirici içkilərin istehsalı və satışının qanunauyğunluğunun yoxlanılması prosesi davam edir.

İqtisadi İnkişaf Nazirliyindən “APA-Economics”ə verilən məlumata görə, nazirlik yanında Antiinhisar Siyasəti və İstehlakçıların Hüquqlarının Müdafiəsi Dövlət Xidməti tərəfindən Bakı şəhəri, Xətai rayonu, Turşu küçəsi, ev 7 ünvanında Məhərrəm Nəsibova məxsus istehsalat sahəsində aparılan yoxlama zamanı sərinləşdirici içkilərin müvafiq reseptura və uyğunluq sertifikatı olmadan istehsal edildiyi, həmin məhsulların yararlılıq müddətinin heç bir normativ sənədə əsaslanmadan təyin olunduğu, məhsulların etiketində istehsal tarixi kimi məhsulun faktiki istehsal tarixindən sonrakı tarixlərin qeyd olunduğu, habelə məhsulların istehsalında mənşəyi məlum olmayan qatqılardan, qablaşdırılmasında isə mənşəyi məlum olmayan polietilen butulkalardan istifadə olunduğu müəyyən edilib.

Bundan başqa, yoxlama zamanı müəssisənin anbarında üzərində istehlakçıları çaşdıran yanlış məlumatlar (istehsalçının adı, ünvanı, həcmi) əks olunmuş 47,8 kq sərinləşdirici içki etiketləri aşkar olunub.

Qanun pozuntuları ilə əlaqədar sərinləşdirici içkilərin istehsalının dayandırılması və müəssisə tərəfindən ticarət şəbəkəsinə paylanmış həmin məhsulların geri yığılması, eləcə də müvafiq reseptura və uyğunluq sertifikatı olmadan istehsal edilmiş 270 litr sərinləşdirici içkinin, mənşəyi məlum olmayan 250 ədəd polietilen butulkanın və 35 kq qatqının, üzərində istehlakçıları çaşdıran yanlış məlumatlar əks olunmuş 47,8 kq etiketlərin qanunvericiliyə müvafiq qaydada məhv edilməsi barədə Dövlət Xidməti tərəfindən sahibkar Məhərrəm Nəsibova icrası məcburi göstəriş verilib.

Araşdırmalar davam edir.