Sahibkarlıq

Ana səhifə

Sahibkarlıq

Gəncədə “Səhmdar cəmiyyətlərində korporativ idarəetmənin və hesabatlıq sisteminin effektivliyinin artırılması” mövzusunda regional seminar keçirilib

03 iyun 2011 14:10 (UTC +04:00)

Bakı - APA-Economics. Bu gün Gəncə şəhərində Azərbaycan Qiymətli Kağızlar üzrə Dövlət Komitəsinin (QKDK) təşkilatçılığı ilə İqtisadi İnkişaf Nazirliyinin (İİN), Auditorlar Palatasının, Avropa Birliyinin (AB) TACİS proqramı nümayəndələrinin iştirakı ilə regionda fəaliyyət göstərən səhmdar cəmiyyətlərin rəhbərləri üçün “Səhmdar cəmiyyətlərində korporativ idarəetmənin və hesabatlıq sisteminin effektivliyinin artırılması” mövzusunda seminar keçirilib.

Seminarda QKDK-nın, İİN-in və Auditorlar Palatasının rəsmiləri, AB-nin TACİS proqramının layihə meneceri, kapital bazarı üzrə beynəlxalq ekspertlər eləcə də, region üzrə yerli icra hakimiyyəti orqanlarının nümayəndələri, eləcə də Gəncə, Göygöl, Şəmkir, Qazax, Goranboy, Samux, Yevlaxdan 150-dən çox səhmdar cəmiyyətlərin rəhbərləri iştirak ediblər.

Tədbiri giriş sözü ilə açan QKDK-nın sədr müavini İlqar Muradov komitə tərəfindən həyata keçirilən maarifləndirmə və məlumatlandırma konsepsiyasının tərkib hissəsi kimi regionda fəaliyyət göstərən səhmdar cəmiyyətlərində korporativ idarəetmənin tətbiqinin, maliyyə hesabatlıq sisteminin qanunvericiliyin tələblərinə uyğun şəkildə qurulmasında və səhmdarların hüquqlarının effektiv qorunmasının təmin edilməsində mühüm əhəmiyyət kəsb etdiyini bildirib.

İİN-in korporativ idarə etmə sektorunun məsləhətçisi Nicat Eyvazzadə, Auditorlar Palatası sədrinin elmi-metodik məsələlər üzrə müşaviri Nəcəf Talıbov, AB-nin kapital bazarları üzrə eksperti Yanis Filopolus, korporativ idarəetmə standartları, səhmdar cəmiyyətlərin hesabatlıq tələbləri, maliyyə hesabatlarının auditi problemləri, AB-nin korporativ hesabatlıq üzrə şəffaflıq tələblərinə dair məruzələri dinlənilib.

QKDK-nın hüquq departamentinin direktoru Kamran Babayev tərəfindən səhmdar cəmiyyətlərin hesabatlığına dair milli qanunvericilik tələbləri və bu istiqamətdə Komitə tərəfindən beynəlxalq təşkilatlarla birgə hazırlanan yeni qanunvericilik təşəbbüslərinə dair geniş təqdimat edilib. Seminar iştirakçılarını bu sahədə maraqlandıran suallar cavablandırılıb.

QKDK-nın sədr müavini İlqar Muradov seminarı yekunlaşdıraraq, tədbirin səhmdar cəmiyyətlərində korporativ idarə etmənin tətbiqinin, maliyyə hesabatlıq sisteminin qanunvericiliyin tələblərinə uyğun şəkildə qurulmasına zəruri töhfə verəcəyinə ümid etdiyini bildirib və QKDK tərəfindən bu kimi maarifləndirmə tədbirlərinin ölkənin digər regionlarında da təşkil ediləcəyinin nəzərdə tutulduğunu seminar iştirakçılarının diqqətinə çatdırıb.