Sahibkarlıq

Ana səhifə

Sahibkarlıq

Qubada elmi-praktik konfrans keçirilib

04 iyun 2011 11:32 (UTC +04:00)

Bakı – APA. İyunun 4-də Quba şəhərində İqtisadi İnkişaf Nazirliyi və Azərbaycan Milli Elmlər Akademiyasının təşkilatçılığı ilə «Regionlarda ixracyönümlü məhsul istehsalı: mövcud potensial və perspektivlər» mövzusunda elmi-praktik konfrans keçirilib. Konfransda müvafiq dövlət qurumları, Quba-Xaçmaz regionu üzrə yerli icra hakimiyyəti orqanlarının nümayəndələri, elmi-tədris müəssisələrinin məsul şəxsləri və sahibkarlar iştirak ediblər.

İqtisadi İnkişaf Nazirliyindən APA-ya verilən məlumata görə, Quba şəhər İcra Hakimiyyətinin başçısı Rauf Həbibov çıxışında son illər regionların sürətlə inkişaf etdiyini, Qubada yeni istehsal və xidmət müəssisələrinin, müasir sosial infrastruktur obyektlərinin yaradıldığını, yeni iş yerlərinin açıldığını diqqətə çatdırıb.

Tədbirdə çıxış edən iqtisadi inkişaf nazirinin müavini Niyazi Səfərov həyata keçirilən sosial-iqtisadi siyasət nəticəsində ölkə iqtisadiyyatında davamlı inkişafın təmin olunduğunu bildirib və qeyd edib ki, regionların sosial-iqtisadi inkişafı iqtisadi siyasətin prioritetlərindəndir. Ölkə regionlarının sosial-iqtisadi inkişafı, yoxsulluğun azaldılması, ərzaq təhlükəsizliyinin təmin edilməsi və digər dövlət proqramlarının uğurlu icrası nəticəsində qeyri-neft sektoru daha da inkişaf edib, ölkə iqtisadiyyatına investisiya qoyuluşu artıb, sahibkarlıq fəaliyyəti genişlənib. Nazir müavini qeyri-neft ixracının artırılması istiqamətində kənd təsərrüfatı məhsullarının istehsalı və emalının beynəlxalq standartlara uyğun olaraq təşkili və qabaqcıl təcrübənin tətbiq olunmasının xüsusi əhəmiyyət daşıdığını bildirib.

Ekologiya və təbii sərvətlər nazirinin müavini Firdovsi Əliyev, İqtisadi İnkişaf Nazirliyi regionların inkişafı və dövlət proqramları şöbəsinin müdiri Sahib Məmmədov, sahibkarlığın inkişafı siyasəti şöbəsinin müdir müavini Hüseyn Paşayev, iqtisadi siyasət, təhlil və proqnozlaşdırma şöbəsinin müdir müavini Nizami Qasımov, Azərbaycan Sahibkarlar Konfederasiyasının baş katibi Məmmədəli Əfəndiyev regionların investisiya potensialının artdığını, sahibkarlığın inkişafına kompleks dövlət dəstəyi tədbirlərinin genişləndiyini, dövlət proqramlarının uğurla icra olunduğunu, regionlarda infrastruktur, sosial-mədəni, istehsal və emal obyektlərinin yaradıldığını, regionların inkişafında sahibkarlığın rolunun artdığını vurğulayıblar.

Tədbirdə qeyd olunub ki, bu yaxınlarda təsdiqlənmiş «2011-2013-cü illərdə Bakı şəhərinin və onun qəsəbələrinin sosial-iqtisadi inkişafına dair Dövlət Proqramı»nda nəzərdə tutulan tədbirlərin icrası üçün İqtisadi İnkişaf Nazirliyində və Bakı şəhər İcra Hakimiyyətində işçi qrupları və monitorinq qrupları yaradılıb, proqramın icrasına başlanılıb.

İqtisadi İnkişaf Nazirliyinin xarici ticarət siyasəti və Ümumdünya Ticarət Təşkilatı şöbəsinin müdiri Bəxtiyar Alışov konfrans iştirakçılarına region sahibkarlarının potensial ixrac bazarlarına çıxış imkanları, qeyri-neft məhsullarının xarici bazarlara çıxarılmasında «GSP+» proqramının əhəmiyyəti və sahibkarların maarifləndirilməsi istiqamətində görülən işlər barədə məlumat verib.

Akademik Əli Nuriyev, Azərbaycan Milli Elmlər Akademiyasının birinci vitse-prezidenti Arif Həşimov, AMEA-nın İqtisadiyyat İnstitutunun direktoru İsa Alıyev və İqtisadi İnkişaf Nazirliyi İqtisadi İslahatlar Elmi-Tədqiqat İnstitutunun direktoru Vilayət Vəliyev elmi-tədqiqatların nəticələrindən istifadə etməklə innovasiyalı sahibkarlığın inkişafı və Quba-Xaçmaz iqtisadi rayonunun potensialı barədə məlumat verib, ölkənin təbii və əmək potensialından səmərəli istifadə etməklə qeyri-neft sektorunun sürətli inkişafının təmin edilməsi üçün elmi araşdırmaların zəruriliyini vurğulayıblar.