Sahibkarlıq

Ana səhifə

Sahibkarlıq

Xaçmazda «Regionlarda sahibkarlığın inkişafına dövlət dəstəyi» tədbiri keçirilib

24 iyun 2011 13:36 (UTC +04:00)

Bakı. Nicat Mustafayev - APA-Economics. Bu Azərbaycan İqtisadi İnkişaf Nazirliyinin Sahibkarlığa Kömək Milli Fondu (SKMF) tərəfindən Xaçmazda «Regionlarda sahibkarlığın inkişafına dövlət dəstəyi» mövzusunda tədbir keçirilib.

Nazirlikdən «APA-Economics»ə verilən məlumata görə, tədbirdə Quba-Xaçmaz iqtisadi rayonunda fəaliyyət göstərən 200-dək sahibkar iştirak edib.

Tədbirdə çıxış edən İqtisadi İnkişaf Nazirliyinin Sahibkarlığın inkişafı siyasəti şöbəsinin müdir müavini Elçin İbrahimov hazırda Azərbaycanın iqtisadi inkişafının yeni keyfiyyət mərhələsinə qədəm qoyduğunu qeyd edib və bildirib ki, görülmüş işlər nəticəsində özəl bölmənin ÜDM-də payı 80%-i ötüb.

İqtisadi İnkişaf Nazirliyinin Quba-Xaçmaz regional bölməsinin müdiri Mətləb Cəfərov məqsədli dövlət proqramlarında nəzərdə tutulmuş tədbirlərin həyata keçirilməsi istiqamətində regionda görülmüş işlər və həyata keçirilməsi nəzərdə tutulan tədbirlər barədə, SKMF-nın icraçı direktoru Şirzad Abdullayev isə Fondun fəaliyyəti, güzəştli kreditlər hesabına bölgələrdə, o cümlədən Quba-Xaçmaz iqtisadi rayonunda həyata keçirilən layihələr barədə tədbir iştirakçılarına məlumat verib.

Ş.Abdullayev qeyd edib ki, 2011-ci ilin ötən dövrü ərzində ümumilikdə sahibkarlıq subyektlərinin 779 investisiya layihəsinin maliyyələşdirilməsinə 66,2 mln. manat, o cümlədən yeni texnologiyaların tətbiqinə əsaslanan 43 böyük və iri həcmli investisiya layihəsinin (6 müasir çörək istehsalı müəssisəsinin, 10 soyuducu anbar kompleksinin, südlük istiqamətli 2 cins heyvandarlıq kompleksinin, 5 müasir istixana kompleksinin, 2 süd məhsullarının emalı müəssisəsinin, 5 quşçuluq təsərrüfatının, 2 ət emalı (kəsim sexi, meyvə-tərəvəz emalı, bitki mənşəli qida yağları istehsalı, quru meyvə istehsalı, mebel istehsalı, kağız və karton məmulatları istehsalı, parça istehsalı, tikinti materiallarının istehsalı, 3 kənd təsərrüfatı məhsulları istehsalı müəssisəsinin yaradılması və turizm infrastrukturunun inkişafı üzrə layihələrin) maliyyələşdirilməsinə 57 mln. manat və 736 kiçik həcmli investisiya layihəsinin maliyyələşdirilməsinə 9,2 mln. manat güzəştli kredit verib və bu kreditlər hesabına 3 301 yeni iş yerinin yaradılacağı nəzərdə tutulub.

Tədbir çərçivəsində müvəkkil kredit təşkilatları vasitəsilə Xaçmaz rayonunda və ətraf rayonlarda fəaliyyət göstərən 32 sahibkarlıq subyektinə 440 min manat güzəştli kredit vəsaiti verilib ki, bu kreditlər hesabına 60-a yaxın yeni iş yerinin yaradılması nəzərdə tutulur.

Qeyd edək ki, tədbir zamanı sahibkarlar üçün güzəştli kreditlərdən istifadə mexanizmi, investisiya layihələrinin hazırlanmasına dair treninq keçirilib, sahibkarlara metodiki materiallar paylanıb.