Sahibkarlıq

Ana səhifə

Sahibkarlıq

Azərbaycanda 5-6 dəqiqəyə vergi qeydiyyatına alınmaq mümkündür

01 iyul 2011 13:48 (UTC +04:00)

Bakı. Əli Əhmədov - APA-Economics. Bu gün Vergilər Nazirliyinin İnternet Vergi İdarəsində Azərbaycanda ilk dəfə olaraq fiziki şəxsin fərdi sahibkar kimi onlayn qeydiyyatdan keçməsinə həsr olunmuş tədbir keçirilib.

“APA-Economics”in xəbərinə görə, tədbirdə fiziki şəxslərin onlayn üsulla fərdi sahibkar kimi qeydiyyatdan keçməsinin yaratdığı üstünlüklər, bununla bağlı prosedurlar barədə məlumat verilib.

Qeydiyyatdan keçən Emin Əsgərov jurnalistlərə bildirib ki, fiziki şəxslərin onlayn üsulla qeydiyyatının tətbiqindən təsadüfən - vergi idarəsinə gələndə xəbər tutub. Bura hüquqi şəxsin qeydiyyatı barədə məlumat almaq üçün gələn Eminə vergi əməkdaşları belə bir imkanın olduğunu da bildiriblər. Fərdi sahibkar kimi qeydiyyatdan keçmə prosedurlarının həddən artıq asan olduğunu görən E.Əsgərov bu üsulla qeydiyyatdan keçməyi qərara alıb. Mətbuatın iştirakı ilə aparılan qeydiyyat proseduru cəmi 5-6 dəqiqə çəkib. Adı çəkilən şəxs vergi qeydiyyatına alınıb və ona qeydiyyat şəhadətnaməsi təqdim olunub.

Qeyd edək ki, bu yenilikdən sonra fiziki şəxsin fərdi sahibkar kimi onlayn qeydiyyatdan keçməsi üçün yalnız şəxsiyyət vəsiqəsinin yanında olması kifayətdir. Fiziki şəxs nazirliyin rəsmi internet saytındakı müvafiq bölməyə daxil olaraq şəxsiyyət vəsiqəsindəki məlumatları və digər əsas məlumatları (ev telefonu, internet ünvanı və s.) daxil edir. Bundan sonra ona müvafiq kod və vergi qeydiyyatından keçmə barədə bildiriş verilir. Bu proseduru internetə çıxış olan istənilən kompüter vasitəsilə həyata keçirmək mümkündür. Ümumilikdə bu proses cəmi 5-6 dəqiqə davam edir. Başqa sözlə, yenilik nəticəsində internetə çıxışı olan istənilən fiziki şəxs əlavə vaxt itkisi olmadan, vergi orqanına getmədən fərdi sahibkar kimi qeydiyyata alına bilər. Yaranmış imkandan sui-istifadə və mənfi məqsədlərlə istifadənin qarşısının alınması üçün lazımi təhlükəsizlik tədbirləri görülüb. Belə ki, vergi orqanlarının şəbəkəsi Daxili İşlər Nazirliyinin bazasına qoşulub ki, bu da vətəndaşların səhv məlumat daxil etməsinin qarşısını alır.

Yeni xidmətin tətbiqini «Bir pəncərə» sistemindən sonra ən mühüm yenilik sayan Bakı şəhər Vergilər Departamentinin «Kommersiya hüquqi şəxslərin dövlət qeydiyyatı» idarəsinin rəisi Nigar Alimova bildirib ki, gələcəkdə hüquqi şəxslərin elektron (internet vasitəsilə) qeydiyyatının başlanması ilə bağlı tədbirlər görülür.