Sahibkarlıq

Ana səhifə

Sahibkarlıq

Azərbaycanda yeni çörək və un məmulatları zavodu tikiləcək

13 iyul 2011 08:44 (UTC +04:00)

Şirkətdən “APA-Economics”ə verilən məlumata görə, “Sağlam Qida” adlanacaq zavod 2012-ci ilin may ayında işə başlayacaq.

Ümumi dəyəri 25 mln. manat olacaq zavodun təməlqoyma mərasimi bu ilin avqust ayının ilk on günlüyündə keçiriləcək. Zavodun istehsal edəcəyi çörəyin qiyməti növündən asılı olaraq 0,3-2 manat arasında dəyişəcək.

“Sağlam Qida” zavodu Sahibkarlığa Kömək Milli Fondunun, “Paşabank”ın və “Commerzbank”ın ayırdığı kreditlər və “Delta Group” şirkətinin daxili maliyyə resursları hesabına tikiləcək. Zavodda istehsalat prosesi Almaniya “Werner Pfleiderer” şirkətinin texnologiyaları əsasında və beynəlxalq standartlara uyğun şəkildə qurulacaq. Tikinti işləri Türkiyənin “Meytek” şirkəti tərəfindən aparılacaq.

Zavodda 500 nəfər işçinin çalışacağı planlaşdırılır. Gündəlik istehsal gücü 124 ton, 2013-cü ilin əvvəlinə isə bu rəqəmin 200 tona çatacağı planlaşdırılır. İlk çörək məhsullarının 2012-ci il mayında satışa buraxılacağı gözlənilir.

“Bu zavodun Azərbaycanda analoqu yoxdur. İstehsalat prosesi beynəlxalq keyfiyyət standartlarına tam cavab verəcək. İstehsal edəcəyimiz çörək və un məmulatları HACCP gigiyena standartlarına uyğun istehsal olunacaq. Bizim üçün əsas olan alıcılarımızı münasib qiymətə yüksək keyfiyyətli çörək məhsulları ilə təmin etməkdir”, - deyə “Delta Group”un təsisçisi Aydın Mehdiyev bildirib.

Qeyd edək ki, “Delta Group” MMC 2001-ci ildə Azərbaycanda təsis edilib. Şirkət əsasən müxtəlif ərzaq və qida məhsullarının dağıtımı və istehsalı ilə məşğuldur. Şirkət Bakıda 4 mindən yuxarı ticarət məntəqəsinə xidmət göstərir və Azərbaycanın 9 regionunda filialı var. “Delta Group” həmçinin İsrail, Gürcüstan, Ukrayna və Tacikistan kimi ölkələrdə də fəaliyyət göstərir. Şirkət “Anchor”, “Wawel”, “Amerlander”, “Asnaf”, “Ryaba”, “Kamar” və s. kimi məşhur qida məhsullarının yayımı ilə məşğul olmaqla yanaşı “Bismak” biskvit və makaron məmulatları, müxtəlif qida məhsullarının istehsalı ilə məşğuldur.