Sahibkarlıq

Ana səhifə

Sahibkarlıq

SKMF Bakıda 22 sahibkarlıq subyektinə 435 min manat güzəştli kredit verib

14 iyul 2011 10:18 (UTC +04:00)

Bakı. Elnur Hüseynquluyev - APA-Economics. Bu gün Sahibkarlığa Kömək Milli Fondu (SKMF) Bakının Rəsulzadə qəsəbəsində «Bakı qəsəbələrində sahibkarlığın inkişafına dövlət dəstəyi» mövzusunda növbəti tədbir keçirib.

«APA-Economics»ın məlumatına görə, Bakı qəsəbələrində fəaliyyət göstərən 300-dək sahibkarın qatıldığı tədbirdə sahibkarlar üçün güzəştli kreditlərdən istifadə mexanizmi, investisiya layihələrinin hazırlanması və təqdim olunmasına dair maarifləndirici treninq keçirilib, həmçinin müasir texnologiyaların tətbiqinə əsaslanan layihələrin əhəmiyyəti barədə ətraflı məlumat verilib.

Tədbirdə Binəqədi rayon İcra Hakimiyyətinin başçısı Alı Qocayev dövlət başçısı tərəfindən Bakı qəsəbələrinin sosial-iqtisadi inkişafına göstərdiyi diqqət və qayğı nəticəsində Binəqədi də sahibkarlıq fəaliyyətinin genişləndiyini, yeni istehsal və xidmət müəssisələrinin, sosial infrastruktur obyektlərinin yaradıldığını, əhalinin məşğulluq səviyyəsinin yüksəldiyini bildirib.

Sonra Binəqədi rayonunun iqtisadi potensialına uyğun olaraq güzəştli kreditlər hesabına maliyyələşdirilməsi nəzərdə tutulan sahələrin, o cümlədən faraş tərəvəz məhsullarının yetişdirilməsi üçün müasir istixana komplekslərinin, ətlik istiqamətli quşçuluq təsərrüfatlarının, kiçik həcmli ət kəsimi və emalı müəssisəsinin yaradılması üzrə nümunəvi investisiya layihələrinin təqdimatı keçirilib.

SKMF-in icraçı direktoru Şirzad Abdullayev fondun vəsaitləri hesabına bu ilin əvvəlindən indiyədək sahibkarlıq subyektlərinin 895 investisiya layihəsinin maliyyələşdirilməsinə 74,3 mln. manat vəsait ayrıldığını bildirib: «Verilmiş güzəştli kreditlərin 18 mln. manatı Bakı şəhərinin qəsəbələrində sahibkarların investisiya layihələrinin maliyyələşdirilməsinə yönəlib. Ümumiyyətlə, bu layihələrin reallaşdırılması 920-yə yaxın iş yerinin açılmasına imkan verəcək».

Daha sonra müvəkkil kredit təşkilatları vasitəsilə Bakıda fəaliyyət göstərən 22 sahibkarlıq subyektinə 435 min manat güzəştli kredit verilib. Bu kreditlər hesablına 60-a yaxın yeni iş yerinin açılması nəzərdə tutulur.