Sahibkarlıq

Ana səhifə

Sahibkarlıq

İqtisadi inkişaf naziri istehsalçı şirkətlərlə görüş keçirib

20 iyul 2011 10:59 (UTC +04:00)

Bakı - APA-Economics. Bakı Biznes Mərkəzində İqtisadi İnkişaf Nazirliyinin (İİN), Azərbaycan Sahibkarlar (İşəgötürənlər) Təşkilatları Milli Konfederasiyasının və rəqabət qabiliyyətli sənaye məhsulu istehsal edən 100-dən artıq müəssisənin nümayəndələrinin iştirakı ilə görüş keçirilib.

İİN-dən “APA-Economics”ə verilən məlumata görə, tədbirdə çıxış edən iqtisadi inkişaf naziri Şahin Mustafayev prezident İlham Əliyev tərəfindən həyata keçirilən uğurlu iqtisadi siyasət nəticəsində ölkə iqtisadiyyatının davamlı inkişaf etdiyini, iqtisadiyyatın diversifikasiyasının uğurla həyata keçirildiyini, rəqabət qabiliyyətli və ixrac yönümlü məhsul istehsalının həcminin artdığını qeyd edib.

Bildirilib ki, 2011-ci ilin birinci yarısında ÜDM 0,9%, qeyri-neft sektoru 7,2%, kənd təsərrüfatı 6,2%, rabitə və informasiya 14,4% artıb. Bu ilin yanvar-iyun ayları ərzində Azərbaycanda xarici ticarət dövriyyəsinin həcmi 17,43 mlrd. ABŞ dolları, o cümlədən idxalın həcmi 4,34 mlrd. ABŞ dolları, ixracın həcmi isə 13,09 mlrd. ABŞ dolları təşkil edib. Bu dövrdə qeyri-neft ixracı 43% artıb.

Tədbirdə qeyd edilib ki, İİN tərəfindən rəqabət qabiliyyətli məhsul istehsal edən müəssisələr haqqında yeni kataloqun hazırlanması və nazirliyin internet səhifəsində yerləşdirilməsi, həmçinin müxtəlif tədbirlərdə təqdim edilməsi nəzərdə tutulur. Kataloqun hazırlanması üçün istehsalçı şirkətlər istehsal etdikləri məhsul və avadanlıqlar, onların istehsal həcmi, məhsulların texniki göstəriciləri haqqında məlumatları nazirliyə təqdim etməlidirlər. Bu məlumatlar növbəti görüşdə potensial alıcılara da təqdim ediləcək.

Tədbirdə Azərbaycan Sahibkarlar (İşəgötürənlər) Təşkilatları Milli Konfederasiyasının prezidenti Məmməd Musayev istehsal müəssisələri arasında əlaqələrin genişləndirilməsi istiqamətində görülmüş işlərdən, Azərbaycanda İxracın və İnvestisiyaların Təşviqi Fondunun prezidenti Adil Məmmədov ölkəmizdə istehsal edilən müasir texnologiyalara əsaslanan məhsul və avadanlıqların təbliğ olunması sahəsində həyata keçirilən tədbirlərdən bəhs edib, İİN-in Dövlət investisiyaları şöbəsinin müdiri Kamal Hacıyev dövlət satınalmaları haqqında, Müdafiə Sənayesi Nazirliyinin şöbə müdiri Vəli Fətəliyev isə nazirliyin müəssisələri tərəfindən istehsal edilən mülki təyinatlı məhsullar barədə məlumat verib.

Tədbirdə çıxış edən “Azərkimya” İstehsalat Birliyinin Müşahidə Şurasının sədri Muxtar Babayev, “Azenko” şirkətinin İdarə Heyəti sədrinin müavini Zaur Məmmədov, “Bakı Tikiş Fabriki” ASC-nin direktoru Fədai Rəhimov, Gəncə Avtomobil Zavodunun direktoru Kamran Nəzərov, “ATEF Elektromaş” ASC-nin İdarə Heyətinin sədri Talıb Əlixanbəyov, “Mətanət A” şirkətinin prezidenti Elxan Bəşirli təmsil etdikləri müəssisələrin fəaliyyəti və istehsal etdikləri məhsullar barədə məlumat verib, müxtəlif təkliflər irəli sürüblər.

Tədbirdə həmçinin istehsal müəssisələrinin əlaqələrinin daha da genişləndirilməsi, rəqabət qabiliyyətli məhsul istehsal edən şirkətlər haqqında yeni kataloqun hazırlanması və s. məsələlər müzakirə edilib, iştirakçıları maraqlandıran suallar cavablandırılıb.