Sahibkarlıq

Ana səhifə

Sahibkarlıq

Beynəlxalq ekspert: “Azərbaycanda icazə və yoxlamalar sistemi dəyişməlidir”

22 iyul 2011 08:53 (UTC +04:00)

Bakı. Əli Əhmədov - APA-Economics. Azərbaycanda investisiya mühitini yaxşılaşdırmaq üçün ölkədə icazələr və dövlət nəzarəti (yoxlamalar) sistemi təkmilləşdirilməlidir. Bu ba¬rə¬də «APA-Economics»ə (IFC) BP-nin və İsveçrə hökumətinin (SECO) dəstəyi ilə Bey¬nəl¬xalq Maliyyə Korporasiyasının həyata keçirdiyi «İnvestisiya mühiti üzrə məsləhət xid¬mətləri» layihəsinin rəhbəri İrina Niderberqer bildirib.

Onun sözlərinə görə, burada əsas məqsəd sahibkarların bu prosedurlara sərf etdiyi vəsaiti və vaxtı azaltmaq, eləcə də tələblərin aydın olmasına nail olmaqdır: «Bundan başqa, yoxlamaların aparılması proseduru sadə və həm yoxlayıcıya, həm də sahibkarlara aydın olmalıdır ki, həmin prosedurun həyata keçirilməsi ilə bağlı tələblər başqa formada yozula bilməsin».

İ.Niderberqer bildirir ki, Azərbaycanda sahibkarlıq subyektlərində yoxlama sistemi müəssisənin risk dərəcəsinə uyğun olaraq təşkil olunmalıdır. Ekspertin sözlərinə görə, riskin dərəcəsi bir neçə amillə ölçülür: «Bunlar baş verə biləcək faciənin həcmi, onun insan həyatı və sağlamlığına təsir dərəcəsi və s.-dir. Müəssisədə yoxlama niyə aparılır? Məsələn, yanğından qorunma və ya zəhərlənmənin qarşısının alınması üçün. Deməli? yoxlamada əsas diqqət də bu risklərin ehtimalının böyük və aktual olduğu sahələrə yönəlməlidir. Bu yanaşma risk dərəcəsinə görə sahibkarlıq subyektlərini qruplaşdırmağa imkan verir. Başqa sözlə, sahibkarlıq subyektlərində yoxlamalar risklərin qiymətlən¬di¬ril¬mə¬si sisteminə əsaslanmalıdır. Hazırda ölkələrin əksəriyyəti belə sistemi tətbiq edirlər. Biz Azərbaycanın da belə sistemə keçməsini dəstəkləyirik».

Ekspert qeyd edib ki, biznes yoxlamalarda digər məsələ yoxlama vərəqələrindən istifadə edilməsidir: “Həmin vərəqələr yoxlanılacaq məsələlərin tam və dəqiq siyahısını müəyyən edir, yoxlama yalnız həmin siyahı çərçivəsində aparılır. Həmin siyahı qanunvericilik normaları əsasında formalaşır. Bu praktika dünyada getdikcə yayılmaqla yoxlama prosedurunu sadələşdirir, sürətləndirir, habelə sahibkara və yoxlayıcıya qanunun tələbləri ilə sadə formada tanış olmağa və onlara əməl etməyə imkan verir”.

İ.Niderberqer bildirib ki, Azərbaycanda biznes icazələri sistemi də islahatlar tələb edir. IFC-nin sahibkarlar arasında apardığı sorğuların təhlili onu göstərir ki, Azərbaycanda iş adamları öz vaxt və resurslarının böyük hissəsini icazə xarakterli sənədlərin əldə edilməsinə və dövlət orqanlarındakı inzibati maneələri keçməyə sərf edirlər: “Dövlət orqanlarında süründürməçilik və qeyri-müəyyənliklər çoxdur. İş adamı isə nəticəsini bilmədiyi bir işə pul qoymaq istəməz. Yəni bu məsələdə aydınlaşmanın artırılması mümkündür və biz bu sahədə Azərbaycan hökumətinə kömək etmək istəyirik. İcazələrin alınması üçün prosedurların sayının azaldılması, tələblərin aydınlığı və dəqiqliyi də tələb olunur. Məsələn, Azərbaycanda icazə və yoxlama sistemindəki problemlər aradan qaldırılsa, buradakı iş adamları müxtəlif inzibati və qanunvericilik tələblərinin öyrənilməsi ilə bağlı xərclərinin 20-30%-nə qənaət edə bilərlər ki, bu vəsait də investisiyaların artımına sərf oluna bilər”.