Sahibkarlıq

Ana səhifə

Sahibkarlıq

“Azərsun” Rusiyada konserv zavodu tikir

23 iyul 2011 08:55 (UTC +04:00)

Ümumi məbləği 260 milyon rubl (10 milyon dollar) olan zavodun tikintisinin 2012-ci ildə başa çatması nəzərdə tutulur. Bu barədə vilayət investisiya departamentinin mətbuat xidmətindən bildiriblər.

Məlumata görə, zavodda tomat, yaşıl noxud, duzlu xiyar, konservləşdirilmiş qarğıdalı, eləcə də digər meyvə tərəvəz konservləri və s. məhsullar istehsal olunacaq. Müəssisənin istehsal gücünün ildə 50 milyon banka olacağı gözlənilir. Müəssisənin istifadəyə verilməsindən sonra burda 250 daimi, 300-400 mövsümi iş yerlərinin açılması nəzərdə tutulur.

Mətbuat xidmətinin məlumatında bildirilir ki, hazırda zavodun tikintisi tam gücü ilə davam edir, ətrafdakı 1000 hektarlıq ərazidə isə tərəvəz məhsulları əkilir.

«Azersun Holding»də şirkətin Rusiyanın Krasnodar vilayətinə investisiya qoyuluşu ilə bağlı layihələr həyata keçirdiyini təsdiqləyiblər. Şirkətdən “APA-Economics”-ə bildirilib ki, şirkət ötən ilin sentyabrında vilayətdə çay fabrikini işə salıb. Fabrikin gücü ildə 25 milyon qutu təşkil edir. Çay fabrikinin açılış mərasimində konserv zavodunun da təməli qoyulub. Ümumilikdə 5 hektar ərazidə yerləşən zavodun örtülü sahəsi 12 min kvadratmetr nəzərdə tutulur. Təməlqoyma mərasimində iştirak edən şirkətin prezidenti Abdolbori Goozal bildirib ki, Azərbaycan şirkətlərinin böyüyərək xarici ölkələrə investisiya yatırması prezident İlham Əliyevin apardığı iqtisadi siyasətin və özəl sektora qayğısının nəticəsidir.

«Rusiya ərazisinə investisiya qoyuluşu da dövlət başçısının xeyr-duası ilə
həyata keçirilir», - deyə şirkət rəhbəri vurğulayıb.

Qeyd edək ki, Krasnodar vilayətində investisiya layihələrinin reallaşdırılması barədə müqavilə qubernator Aleksandr Tkaçov və «Azersun Holding»in prezidenti A. Goozal arasında «Soçi-2009» investisiya forumu çərçivəsində imzalanıb. Sənədə əsasən, vilayət iqtisadiyyatına 150 milyon rubl investisiyanın qoyulması nəzərdə tutulurdu. Amma sonradan aparılmış marketinq tədqiqatları nəticəsində Azərbaycan tərəfi investisiya qoyuluşlarını 360 milyon rubla qaldırıb.