Sahibkarlıq

Ana səhifə

Sahibkarlıq

Göyçayda sahibkarlara 450 min manatlıq güzəştli kredit verilib

12 avqust 2011 10:16 (UTC +04:00)

Göyçay. Elvin Yaqubov - APA. İqtisadi İnkişaf Nazirliyinin Sahibkarlığa Kömək Milli Fondu (SKMF) avqustun 12-də Göyçay rayonunda «Regionlarda sahibkarlığın inkişafına dövlət dəstəyi» mövzusunda tədbir keçirib. APA-nın məlumatına görə, Aran iqtisadi rayonunda fəaliyyət göstərən 250-ə yaxın sahibkarın iştirak etdiyi tədbirdə sahibkarlar üçün güzəştli kreditlərdən istifadə mexanizminə və investisiya layihələrinin hazırlanmasına dair treninq keçirilib, onlara metodiki materiallar paylanılıb. Tədbirdə müasir ətlik quşçuluq təsərrüfatının yaradılması və ya müasir texnologiyaların tətbiqi ilə yenidən qurulması, ətlik və südlük üçün müasir heyvandarlıq kompleksinin yaradılması, müasir suvarma sisteminin tətbiqi ilə intensiv bağçılıq təsərrüfatının yaradılması üzrə nümunəvi investisiya layihələrinin təqdimatı keçirilib.

Tədbirdə çıxış edən SKMF-in icraçı direktoru Şirzad Abdullayev bildirib ki, fond müvəkkil kredit təşkilatları vasitəsilə 2011-ci ilin ötən dövrü ərzində sahibkarlıq subyektlərinin 1061 investisiya layihəsinin maliyyələşdirilməsinə 89,5 mln. manat, o cümlədən yeni texnologiyaların tətbiqinə əsaslanan 59 böyük həcmli investisiya layihəsinin maliyyələşdirilməsinə 76,9 mln. manat və 1002 kiçik həcmli investisiya layihəsinin maliyyələşdirilməsinə 12,6 mln. manat güzəştli kredit verib. Bu kreditlər hesabına 4277 yeni iş yerinin yaradılması nəzərdə tutulub.

Tədbirdə rayon icra hakimiyyəti başçısının birinci müavini Ramiz İbrahimov, İqtisadi İnkişaf Nazirliyinin sahibkarlığın inkişafı siyasəti şöbəsinin müdiri Zaur Qasımov, Nazirliyin Aran regional bölməsinin müdiri Elbrus Hüseynov, sahibkarlar çıxış ediblər.

Sonra müvəkkil kredit təşkilatları vasitəsilə Göyçay və ətraf rayonlarda fəaliyyət göstərən 37 sahibkarlıq subyektinə 448 min manat həcmində güzəştli kreditlər verilib. Bu kreditlər hesabına 72 yeni iş yerinin yaradılması nəzərdə tutulur. Həmçinin, SKMF-in güzəştli krediti hesabına «Göyçay-Konyak Zavodu» ASC-də illik istehsal gücü 10 min dekalitr spirt olan üzüm emalı müəssisəsində aparılan tikinti işlərinə və «Göyçay-Süd» ASC-də tutumu 1000 ton olan soyuducu anbar kompleksinin fəaliyyətinə baxış keçirilib.