Sahibkarlıq

Ana səhifə

Sahibkarlıq

Azərbaycan Dövlət Neft Şirkətinin rəhbərliyinin gənclərlə görüşü keçirilib

13 avqust 2011 08:21 (UTC +04:00)

Bakı. Nicat Mustafayev-APA-Economics. Azərbaycan Dövlət Neft Şirkətinin (ARDNŞ) Təqaüd Proqramı çərçivəsində xaricdə təhsil alan və yay tətilində Bakıda olan tələbələr, bu il Təqaüd Proqramı çərçivəsində təhsili maliyyələşdirilən tələbələr və «2007-2015-ci illərdə Azərbaycan gənclərinin xarici ölkələrdə təhsili üzrə dövlət proqramı»’ çərçivəsində cari ildə təhsilə başlayacaq tələbələrlə ARDNŞ rəhbərliyinin görüşü keçirilib.

«APA-Economics»in məlumatına görə, görüşdə ARDNŞ prezidenti Rövnəq Abdullayev, təhsil naziri Misir Mərdanov, Şirkətin idarə və müəssisələrinin rəhbərləri iştirak edib. Tədbirdə çıxış edən R. Abdullayev çevik, müasir və rəqabətə davamlı bir quruma çevrilmək kursu götürən ARDNŞ-ın xarici ölkələrdə həyata keçirdiyi investisiya proqramlarından danışıb, həmin layihələrin uğur qazanması üçün müasir biliklərə yiyələnmiş gənc kadrlara böyük ehtiyac olduğunu, kadr hazırlığı sahəsində Şirkətin həyata keçirdiyi proqramlar haqqında iştirakçılara məlumat verib. ARDNŞ prezidenti gənclərin müasir elmi və təcrübi biliklərə həvəsləndirilməsi məqsədi daşıyan Təqaüd Proqramlarının əhəmiyyətini xüsusi vurğulayıb və bildirib ki, 2010-2011-ci tədris ilinin nəticələri üzrə keçirilən 11-ci Təqaüd müsabiqəsinə ilk dəfə olaraq rekord sayda 1 928 tələbə müraciət edib, müsabiqəni uğurla keçmiş 200 tələbə ARDNŞ-ın təqaüdünə layiq görülüb. Müsabiqədə təkcə Bakının yox, həm də digər şəhərlərin ali məktəb tələbələri iştirak edir.

R. Abdullayev onu da qeyd edib ki, təhsilini ARDNŞ təqaüdü ilə başa vurmuş, məzunlara Dövlət Neft Şirkətində ixtisaslarına uyğun iş təklif olunur: «Son 2 ildə bu yolla 88 məzun işə qəbul olunub. Eyni zamanda ARDNŞ savadlı gənc neftçi mütəxəssislərin hazırlanması, kadr potensialının dünya təcrübəsinə yiyələnməsi məqsədi ilə gənclərin xaricdə təhsili üzrə Təqaüd Proqramını həyata keçirir. İndiyədək bu Proqrama 122 gənc cəlb olunub. Proqramın 39 iştirakçısı artıq təhsilini müvəffəqiyyətlə başa vuraraq vətənə qayıdıb və hazırda ARDNŞ-ın müxtəlif strukturlarında çalışırlar. Bu il Proqrama daha 55 nəfər qəbul olunub və seçim davam edir. ARDNŞ xarici ölkələrin nüfuzlu ali məktəblərində dövlət təqaüdü ilə, öz hesablarına və ya başqa təşkilatların təqaüdləri hesabına təhsil alaraq, yaxşı qiymətlərlə bitirmiş gəncləri öz strukturlarında müvafiq işlərə cəlb edilməsində də maraqlıdır».

Şirkət prezidenti 2010-cu ildən etibarən ARDNŞ-də ödənişli yay təcrübəsi proqramının təşkil olunduğunu da vurğulayıb. Belə ki, 2011-ci ildə keçirilən layihədə ölkə daxilində və xaricdə ali məktəblərin bakalavriat və magistratura pillələrində ARDNŞ-da tələb olunan ixtisaslar üzrə təhsil alan, «yaxşı» və «əla» qiymətlərlə oxuyan 226 nəfər seçilib. Həmin tələbələr 1 və ya 2 aylıq ödənişli təcrübə keçmək üçün ARDNŞ-ın müvafiq müəssisələrində müvəqqəti işlə təmin olunub.

Tədbirdə çıxış edən M. Mərdanov gənclərə yaradılan şəraitdən maksimum yararlanmağı tövsiyyə edib. Qeyd edək ki, hazırda ARDNŞ-ın gənc kadrları sırasında ABŞ, Fransa, Böyük Britaniya, Türkiyə, Almaniya, Norveç, Rusiya və s. ölkələrin nüfuzlu ali məktəblərinin məzunları var.