Sahibkarlıq

Sahibkarlıq

SKMF «Bakı qəsəbələrində sahibkarlığın inkişafına dövlət dəstəyi» mövzusunda növbəti tədbir keçirib

17 avqust 2011 10:42 (UTC +04:00)

Bakı. Nicat Mustafayev – APA-Economics. Bu gün Bakı şəhərinin Badamdar qəsəbəsində Azərbaycan İqtisadi İnkişaf Nazirliyinin Sahibkarlığa Kömək Milli Fondu (SKMF) «Bakı qəsəbələrində sahibkarlığın inkişafına dövlət dəstəyi» mövzusunda növbəti tədbir keçirib. Tədbirdə Səbail rayonunun qəsəbələrində fəaliyyət göstərən 100-ə yaxın sahibkar iştirak edib.

«APA-Economics»in məlumatına görə, tədbir çərçivəsində sahibkarlar üçün güzəştli kreditlərdən istifadə mexanizmi, investisiya layihələrinin hazırlanması və təqdim olunmasına dair maarifləndirici treninq keçirilib, həmçinin müasir texnologiyaların tətbiqinə əsaslanan layihələrin əhəmiyyəti barədə tədbir iştirakçılarına ətraflı məlumat verilib.

Tədbirdə həmçinin, Səbail rayonunun iqtisadi potensialına uyğun olaraq, güzəştli kreditlər hesabına maliyyələşdirilməsi nəzərdə tutulan iki istiqamət üzrə – müasir çörək istehsalı müəssisəsinin, kiçik həcmli müasir ət kəsimi və emalı müəssisəsinin yaradılması üzrə nümunəvi investisiya layihələrinin təqdimatı keçirilib.

Tədbirdə çıxış edən İqtisadi İnkişaf Nazirliyi sahibkarlığın inkişafı siyasəti şöbəsinin müdiri Zaur Qasımov həyata keçirilən tədbirlər nəticəsində qeyri-neft sektorunun inkişafının sürətləndiyini, davamlı sosial-iqtisadi inkişafa nail olunduğunu, əhalinin həyat səviyyəsinin daha da yaxşılaşdığını qeyd edib, sahibkarlığın inkişafına dövlət dəstəyinin sistemli şəkildə həyata keçirilməsi nəticəsində iqtisadiyyatda özəl bölmənin rolunun daha da artdığını vurğulayıb.

İqtisadi İnkişaf Nazirliyi regionların inkişafı və dövlət proqramları şöbəsinin müdiri Sahib Məmmədov isə çıxışında «2011-2013-cü illərdə Bakı şəhərinin və onun qəsəbələrinin sosial-iqtisadi inkişafına dair Dövlət Proqramı» çərçivəsində həyata keçiriləcək tədbirlər və gələcək inkişaf perspektivləri haqqında məlumat verib.

Öz növbəsində SKMF-ın icraçı direktoru Şirzad Abdullayev sözügedən Dövlət Proqramına uyğun olaraq, Fondun güzəştli kreditləri hesabına maliyyələşdirilmiş layihələr, o cümlədən Səbail rayonunda dövlətin güzəştli kredit vəsaitləri hesabına maliyyələşdirilməsi prioritet hesab olunan sahələr barədə məlumat verib. Fondun başçısı qeyd edib ki, güzəştli kreditlər hesabına 2011-ci ilin ötən dövrü ərzində ümumilikdə sahibkarlıq subyektlərinin 1 102 investisiya layihəsinin maliyyələşdirilməsinə 92,1 mln. manat, o cümlədən yeni texnologiyaların tətbiqinə əsaslanan 57 böyük və iri həcmli investisiya layihəsinin maliyyələşdirilməsinə 77,4 mln. manat və 1 045 kiçik həcmli investisiya layihəsinin maliyyələşdirilməsinə 14,7 mln. manat güzəştli kredit ayrılıb: «Bakı şəhərinin qəsəbələri üzrə 145 investisiya layihəsinin maliyyələşdirilməsinə 23 mln. manat, o cümlədən yeni texnologiyaların tətbiqinə əsaslanan 19 böyük və iri həcmli investisiya layihəsinin maliyyələşdirilməsinə 21,6 mln. manat və 126 kiçik həcmli investisiya layihəsinin maliyyələşdirilməsinə 1,4 mln. manat güzəştli kredit verilib».

Ş.Abdullayev iqtisadiyyatın prioritet sahələri üzrə təqdim ediləcək investisiya layihələrinin güzəştli şərtlərlə maliyyələşdiriləcəyini bildirib.

Tədbir zamanı həmçinin, müvəkkil kredit təşkilatları vasitəsilə Səbail rayonuna aid qəsəbələrdə və digər Bakı qəsəbələrində fəaliyyət göstərən 23 sahibkarlıq subyektinə 1,4 mln. manata yaxın güzəştli kredit vəsaiti verilib ki, bu kreditlər hesabına 81 yeni iş yerinin yaradılması nəzərdə tutulur.