Sahibkarlıq

Ana səhifə

Sahibkarlıq

Sumqayıtda qanunsuz totalizatorlar aşkarlanıb

01 sentyabr 2011 15:09 (UTC +04:00)

Bakı. Əli Əhmədov - APA-Economics. Vergilər Nazirliyi yanında Vergi Cinayətlərinin İbtidai Araşdırılması Departamentinin və 2 saylı Ərazi Vergilər İdarəsinin Sumqayıt şəhərinin müxtəlif yerlərində birgə keçirdiyi operativ nəzarət tədbirləri zamanı şəhərdə qanunsuz loto oyunları təşkil edən bir neçə obyekt aşkarlanıb.

Nazirlikdən «APA-Economics»ə verilən məlumata görə, Əzizov Elşən Nurəddin oğlunun 13-cü mikrorayon, Ü.Hacıbəyov küçəsində yerləşən “Dəniz” kafesində, Rəsulov Rəşad Hafiz oğlunun 45-ci məhəllədə yerləşən obyektində, Əmrahlı Rüfət Fikrət oğlunun 9-cu mikrorayonda yerləşən obyektində, Quluyev Azər Aydın oğlunun 45-ci məhəllədə yerləşən “Kafe-777”-də, Soltanov Ceyhun Muxtar oğlunun Nizami küçəsi, 34-cü məhəllədə yerləşən “Göyərçin” kafesində, Tarverdiyev Elvir Sabir oğlunun 10-cu mikrorayonda yerləşən “Natəvan” şadlıq sarayında və Məmmədov Pərviz Bəşir oğlunun Xırdalan şəhəri, 28-ci məhəllədə yerləşən “Şəms market”in arxasındakı kafedə qanunsuz loto oyunlarının təşkil edildiyi olunduğu aşkar edilib.

Vergi əməkdaşları tərəfindən həmin obyektlərdən 4 ədəd monitor, 5 ədəd monitor üçün kamera, loto kartları və daşları, kağız loto tablosu, loto kartlarında qeydiyyat kimi istifadə olunan dəmir halqa aşkarlanaraq götürülüb.

Digər operativ nəzarət tədbiri zamanı isə Sultanov Ədalət Gülməmməd oğlunun 42-ci məhəllədə yerləşən obyektində, Bayramov Orxan Elxan oğlunun “Roma çay evi - 1” və Babayev Fuad Əlibaba oğlunun 4-cü mikrorayon, ev 14/19 ünvanda yerləşən “Roma çay evi - 2” futbol klublarında qanunsuz olaraq totalizator tipli proqnoz oyunlarının təşkil olunduğu aşkar edilib. Həmin obyektlərdən ümumilikdə 2 ədəd noutbuk, 2 ədəd kompüter prosessoru, 1 ədəd loto oyunları üçün çek aparatı, 1 ədəd ştrix-kod aparatı, futbol kuponları, “qara” mühasibatlıq sənədləri aşkarlanaraq götürülüb.

Vergilər Nazirliyi bir daha xəbərdarlıq edir ki, xüsusi razılıq tələb olunan fəaliyyət növləri ilə belə razılıq (lisenziya) almadan məşğul olan, o cümlədən qanunsuz totalizator fəaliyyəti göstərən bütün fiziki və hüquqi şəxslər barədə müvafiq tədbirlər görüləcək.