Sahibkarlıq

Sahibkarlıq

Keyfiyyətsiz dondurma istehsal edən sahibkara 1,2 min manat maliyyə sanksiyası tətbiq edilib

02 sentyabr 2011 07:58 (UTC +04:00)

Bakı. Nicat Mustafayev - APA-Economics. Azərbaycan paytaxtında keyfiyyətsiz dondurma istehsalı ilə məşğul olan müəssisə cərimələnib.

Azərbaycan İqtisadi İnkişaf Nazirliyindən «APA-Economics»ə verilən məlumata görə, Bakı şəhəri, Səbail rayonu, Badamdar qəsəbəsi, 1-ci massiv, ev 409 ünvanında İlham Məmmədova məxsus istehsalat sahəsində aparılan yoxlama zamanı dondurmaların müvafiq reseptura və gigiyenik sertifikatları olmadan istehsal edilməsi, etiketlərində məhsulun qida və enerji dəyəri haqqında məlumatların göstərilməməsi, habelə istehsal edilən məhsulların keyfiyyət və təhlükəsizliyinə nəzarətin həyata keçirilməsi üçün müvafiq laboratoriyanın olmaması və dondurmaların laborator müayinədən keçirilmədən satışa çıxarılması səbəbindən bu sahibkar barəsində İqtisadi İnkişaf Nazirliyi yanında Antiinhisar Siyasəti və İstehlakçıların Hüquqlarının Müdafiəsi Dövlət Xidməti tərəfindən antiinhisar qanunvericiliyinin tələblərinin pozulması əlamətləri üzrə iş qaldırılıb.

Dövlət Xidmətində istehlakçıları çaşdırmaqla haqsız rəqabətə yol verilməsi ilə bağlı işə baxılıb və «Haqsız rəqabət haqqında» qanunun tələblərini pozduğuna görə İ.Məmmədova 1,2 min manat maliyyə sanksiyası tətbiq edilib.