Sahibkarlıq

Sahibkarlıq

Bakıda Türk İxracat Məhsulları Sərgisi keçiriləcək

02 sentyabr 2011 11:46 (UTC +04:00)

«APA-Economics»in məlumatına görə, sərginin təşkilatçısı indiyədək Azərbaycanda bir neçə sərgi keçirmiş Türkiyənin «Meridyen Uluslararası Fuarçılıq» şirkətidir.

Layihənin Azərbaycan üzrə əlaqələndiricisi Alper Çekic bu gün keçirilən mətbuat konfransında bildirib ki, sərginin keçirilməsində əsas məqsəd Türkiyənin digər ölkələrlə, o cümlədən Azərbaycanla ticarət əlaqələrinin genişləndirilməsidir. Sərgidə inşaat, mebel və emal sənayesi, qida, tekstil, məişət texnikası, kimya sənayesi, kosmetika və hazır geyim kimi müxtəlif sahələri əhatə edən 50-dən çox türk şirkətinin iştirakı gözlənilir.

Tədbir təşkilatçılarının sözlərinə görə, Türkiyə ilə Azərbaycan arasında iqtisadi, o cümlədən biznes əlaqələri kifayət qədər olsa da, bəzi türk şirkətləri hələ də Azərbaycanda işləmirlər: «Sərginin əsas iştirakçıları da Azərbaycan bazarına daxil olmaq istəyən yeni şirkətlərdir. Onlar yerli şirkətlərlə əlaqələr, işbirliyi qurmaq istəyirlər. Məqsəd burda mal satmaq yox, əsl bizneslə, o cümlədən istehsalla məşğul olmaqdır».

Yeri gəlmişkən, təşkilatçılar Azərbaycanda türk şirkətləri üçün uğurlu biznes fəaliyyətinin mümkün ola biləcəyi fəaliyyət sahələri kimi məktəb mebelləri istehsalı, tikinti materiallarının istehsalı, bununla bağlı lazımi texnologiyaların qurulması və s.-i qeyd edirlər. Təşkilatçılar əmin edir ki, budəfəki sərginin iştirakçıları arasında məşhur türk brendləri olacaq.

«Bakı Türk İxracat Məhsulları Sərgisi» sentyabrın saat 10:00-dan 18:00-dək ziyarətçilərə açıq olacaq. Sərginin açılışında Türkiyənin Azərbaycandakı səfiri Hulusi Kılıç, Azərbaycan Sahibkarlar Konfederasiyası və İqtisadi İnkişaf Nazirliyinin nümayəndələri iştirak edəcək.

Xatırladaq ki, «Meridyen Uluslararası Fuarçılıq» şirkəti indiyədək Azərbaycanda böyük marağa səbəb olan «İstanbul Fashion Show» və «Türk İnşaat və Makina» sərgilərini təşkil edib.