Sahibkarlıq

Ana səhifə

Sahibkarlıq

Azpromo WAIPA-nın investisiyalar üzrə beynəlxalq konfransında iştirak edib

07 sentyabr 2011 07:20 (UTC +04:00)

Bakı. Nicat Mustafayev – APA-Economics. Azərbaycanda İxracın və İnvestisiyaların Təşviqi Fondu (Azpromo) Cenevrədə (İsveçrə) keçirilən İnvestisiyanın Təşviqi Agentliklərinin Dünya Assosiasiyasının (WAIPA) investisiyalar üzrə beynəlxalq konfransında iştirak edib.

Azpromo-dan «APA-Economics»ə verilən məlumata görə, tədbirdə dünyanın bir çox ölkələrindən dövlət qurumları və özəl sektorun nümayəndələri, investisiyanın təşviqi agentliklərinin rəhbərləri, elmi və ictimai birliklərin üzvləri də daxil olmaqla, ümumilikdə 300-ə yaxın nümayəndə iştirak edib.

Konfransda müxtəlif panellər üzrə iqtisadi inkişaf prosesi, investisiyaların cəlb edilməsi sahəsində mövcud vəziyyət, maliyyə islahatları və investisiyaların maliyyələşdirilməsi, innovasiya və yaşıl texnologiyalar və s. mövzularda müzakirələr aparılıb. Tədbirdə Azərbaycanı Azpromo-nun rəhbəri Adil Məmmədov təmsil edib. Konfrans çərçivəsində Azpromo ilə WAIPA arasında əlaqələrin mövcud vəziyyəti və əməkdaşlığın genişləndirilməsi perspektivləri ilə bağlı fikir mübadiləsi aparılıb.

Qeyd edək ki, 1995-ci ildə Cenevrədə təsis edilmiş WAIPA-nın 161 ölkədən 245 üzvü var. Ötən ilin iyul ayında Azpromo WAIPA-nın Direktorlar Şurasına üzv, həmçinin Cənubi Qafqaz və Mərkəzi Asiya regionu üzrə təmsilçi seçilib ki, Azərbaycan Cənubi Qafqaz və MDB ölkələrindən WAIPA-nın Direktorlar Şurasına seçilən yeganə təmsilçidir.

WAIPA-nın əsas məqsədi investisiyanın təşviqi agentlikləri arasında əməkdaşlığın genişləndirilməsi, investisiyaların cəlb edilməsi sahəsində təcrübə və investisiya ilə bağlı məlumat mübadiləsi, investisiyanın təşviqi strategiyasının formalaşdırılmasında üzv təşkilatlara dəstək göstərməkdir. WAIPA-nın ali orqanı Direktorlar Şurasıdır. Assosiasiyanın Məsləhət Şurasının üzvləri sırasına isə BMT-nin agentlikləri, İqtisadi Əməkdaşlıq və İnkişaf Təşkilatı, Xarici İnvestisiyalar üzrə Məsləhət Xidməti (FIAS), Beynəlxalq İqtisadi İnkişaf Şurası (IEDC), «PROINVEST» təşkilatları və «Ernest & Young», «GDP Global», «IBM», «Buck Consultants International» və «Investment Consulting Associates» kimi nüfuzlu şirkətlərdir.