Sahibkarlıq

Ana səhifə

Sahibkarlıq

Azərbaycan sahibkarları arasında sorğu keçirilib

09 sentyabr 2011 12:14 (UTC +04:00)

Bakı. Elnur Hüseynquluyev – APA-Economics. Azərbaycanın Sahibkarlığın və Bazar İqtisadiyyatının İnkişafına Yardım Fondu (SBİYF) «İqtisadi islahatlara dair dialoqun qurulması Layihəsi» çərçivəsində bu ilin iyul-avqust aylarında 700 kiçik sahibkarlıq subyekti arasında apardığı sorğunun nəticələrini açıqlayıb.

«APA-Economics»in məlumatına görə, bununla bağlı bu gün keçirilən tədbirdə SBİYF-in sədri Sabit Bağırov sorğu anketinin Dünya Bankı və digər beynəlxalq təşkilatlarının təcrübəsi və biznes mühiti indikatorları nəzərə alınmaqla tərtib edildiyini bildirib. Sorğu anketində 43 sual daxil edilib ki, bunlar da sahibkarlıq mühitinin ümumi qiymətləndirilməsi, dövlət orqanları tərəfindən keçirilən yoxlamalar, rəqabət şəraiti, lisenziyanın alınması, vergi sistemi, gömrük proseduraları, tikinti işlərinin həyata keçirilməsi üçün alınmalı olan sənədlər, həmçinin daşınmaz əmlakın qeydiyyatdan keçirilməsi, Azərbaycanın Ümumdünya Ticarət Təşkilatına üzv qəbul olunması və s. məsələlərlə bağlı olub. Bakı şəhəri və Azərbaycanın 8 iqtisadi rayonunu əhatə edən sorğuya qatılan respondentlərin 12,3%-ni hüquqi, 87,7%-ni isə fiziki şəxslər təşkil edib.

Kiçik sahibkarlıq mühitinin ümumi qiymətləndirilməsi üzrə sorğuda respondentlərin 43%-i biznes mühitinin nə yaxşı, nə də pis olduğunu, 31%-i mövcud durumun əlverişli olduğunu, 13%-i əlverişsiz, 7,7%-i olduqca əlverişli və 3,6%-i olduqca əlverişsiz variantını seçib.

Dövlət orqanları tərəfindən keçirilən yoxlamalar sorğusunda isə respondentlərin hər birinə ildə orta hesabla 22 dəfə yoxlamanın aparıldığını bildirib. Lakin bəzi sahibkarlıq subyektlərində yoxlamanın ümumiyyətlə aparılmadığını qeyd edib.

Yoxlamalara məruz qalanlar ən çox sanitar-epidemioloqlar və icra hakimiyyəti işçilərindən şikayət edir. Yoxlamaların səbəblərinə gəldikdə isə respondentlərin 55,1%-i məmurların məhz qanuni yoxlama ilə əlaqədar müəssisələri ziyarət etdiyi vurğulayıb.

Daha tədbirdə sorğunun nəticələri ilə bağlı geniş təqdimat keçirilib. S.Bağırov ümumilikdə sorğu prosesində əldə olunmuş nəticələrin son 3 ildə müsbət dəyişikliklərin baş verdiyini qeyd edib: «Ümumiyyətlə, belə sorğular ilin sonadək davam edəcək və sorğular nəticəsində təkliflər hazırlanaraq müvafiq dövlət qurumlarına təqdim olunacaq».