Sahibkarlıq

Ana səhifə

Sahibkarlıq

Azərbaycanda holoqram istehsalına başlanıb

14 sentyabr 2011 11:22 (UTC +04:00)

Şirkətin icraçı direktoru Zaur Atayev «APA-Economics»ə açıqlamasında bildirib ki, 6 ay əvvəl fəaliyyətə başlayan şirkətin istehsal gücü ayda 10 mln. holoqram buraxmağa imkan verir: «Sifarişçinin istəyinə uyğun olaraq, holoqramı istənilən formada və ölçüdə hazırlaya bilirik».

İcraçı direktorun sözlərinə görə, şirkətin istehsal etdiyi ən kiçik holoqram 1 sm x 1sm, ən böyüyü isə 3 sm x 3 sm-dir: «Amma bizim danışıq apardığımız şirkətlərdən biri 5 sm x 5 sm ölçülərində holoqram sifariş verib».

Yerli holoqramın qiyməti onun ölçülərindən asılıdır, amma 1 ədədi üçün 1 qəpikdən baha deyil. Z.Atayevin sözlərinə görə, bu holoqramlardan demək olar ki, bütün məhsulların markalanmasında istifadə etmək mümkündür.

Bununla yanaşı, şirkət rəhbəri yerli sahibkarların holoqramlara marağının zəif olduğunu bildirib. Bunun səbəbi isə yerli sahibkarların holoqramın əhəmiyyətini və gətirdiyi üstünlükləri tam anlamaması ilə bağlıdır: «Onlara məlumat verəndə soruşurlar ki, onun biznesi üçün holoqramın nə əhəmiyyəti var, deyirlər onsuz da malım satılır, holoqram lazım deyil. Heç alıcılar da bunun əhəmiyyətini başa düşmürlər – malın üzərində holoqram axtarmırlar».

Qonşu Rusiyada holoqram fabriklərinin gündə 24 saat fasiləsiz işlədiyini bildirən Z.Atayevin sözlərinə görə, Rusiyada satılan malların 90%-i holoqramla təmin olunub: «Bizdə isə bu rəqəm 20-30%-dən çox deyil. Özü də bu həm ölkə daxilində istehsal edilən, həm də xaricdən gətirilən mallara aiddir».

Şirkət rəsmisi vurğulayıb ki, ölkə daxilində istehsal etdiyi və ya idxal etdiyi malları holoqramla təmin etmək istəyən şirkətlər də az deyil. Amma onlar ölkədə belə şirkətin olduğunu bilmədiklərinə görə lazım olan holoqramları xarici ölkələrdə, əsasən Türkiyə və ya Rusiyada sifariş edir: «Onlarla görüşəndə məlum olur ki, iş adamları yerli istehsal haqqında məlumatsızdır».

Z.Atayevin sözlərinə görə, sahibkarları buna həvəsləndirmək üçün qanunvericiliyə dəyişiklik etmək lazımdır: «Məncə qanunvericilikdə nəzərdə tutulmalıdır ki, yerli istehsal olunan bütün mallar holoqramla təmin olunsun, bu həm malların keyfiyyətini, həm istehsalçıların məsuliyyətini artırır, həm də alıcılarda inam yaradar».