Sahibkarlıq

Ana səhifə

Sahibkarlıq

Azərbaycanda pərakəndə ticarət dövriyyəsi 10% artıb

23 sentyabr 2011 07:47 (UTC +04:00)

Bakı. Nicat Mustafayev – APA-Economics. Bu ilin yanvar-avqust aylarında Azərbaycanda pərakəndə ticarət və iaşə müəssisələri üzrə əmtəə və xidmətlərin satışı 2010-cu ilin eyni dövrünün səviyyəsini 10,1% üstələyərək 10,2 mlrd. manata bərabər olub.

Dövlət Statistika Komitəsindən «APA-Ecnomics»ə verilən məlumata görə, ümumi artımın 94,4%-i pərakəndə ticarət müəssisələri, 5,6%-i isə iaşə müəssisələrinin fəaliyyəti sayəsində yaranıb.

«Pərakəndə ticarət və iaşə şəbəkələrində hər bir ölkə sakininə orta hesabla ayda 140,7 manatlıq və ya 2010-cu ilin eyni dövründəkindən 22,5 manat çox müxtəlif əmtəə və xidmətlər realizə edilib», - deyə Komitədən bildirilib.

Yanvar-avqust aylarında özəl müəssisələr üzrə pərakəndə ticarət və iaşə dövriyyəsinin ümumi həcmi 10 136,3 mln. manat, yaxud 2010-cu ilin müvafiq dövrünə nisbətən 10,2% çox olub.

Eyni zamanda, hesabat dövründə pərakəndə ticarət və ictimai iaşə şəbəkələrində əhaliyə satılmış ərzaq məhsullarının həcmi 2,4% artaraq 6 320,3 mln. manat, qeyri-ərzaq mallarının həcmi 28,9% artaraq 3 879,0 mln. manata bərabər olub. Ərzaq məhsullarının həcminin 94,9%-i (5 999,7 mln. manatı) pərakəndə ticarət şəbəkəsində realizə olunub: «Pərakəndə ticarət dövriyyəsinin həcmində ərzaq və qeyri-ərzaq mallarının xüsusi çəkiləri müvafiq olaraq 60,7% və 39,3% təşkil edib. İctimai iaşə müəssisələrində əhaliyə 320,6 mln. manatlıq aşpazlıq və kulinariya emalından keçmiş şəxsi istehsal məhsulları satılıb».

Hesabat dövründə hər bir ölkə sakini orta hesabla ayda pərakəndə ticarət müəssisələrində 82,8 manatlıq ərzaq, 53,5 manatlıq qeyri-ərzaq malları alıb, iaşə müəssisələrində 4,4 manatlıq iaşə xidmətlərindən istifadə edib.

«Pərakəndə ticarət şəbəkəsində əhaliyə 9 878,7 mln. manatlıq və ya əvvəlki ilin yanvar-avqust ayları ilə müqayisədə 9,7% çox əmtəə satılıb. Real artımın 72%-i hüquqi şəxs statuslu və hüquqi şəxs yaratmadan sahibkarlıq fəaliyyəti göstərən fərdi sahibkarların ticarət müəssisələrinin, 28%-i yarmarka və bazarların ticarət fəaliyyəti sayəsində yaranıb», - deyə Komitədən bildirilib.

Bundan başqa, pərakəndə ticarət dövriyyəsinin tərkibində qeyri-dövlət müəssisələrinin xüsusi çəkisi 99,4% olub, bu müəssisələrdən əhali 9 822,9 mln. manatlıq və ya əvvəlki ilin eyni dövrü ilə müqayisədə 9,9% çox istehlak malları alıb.

İaşə müəssisələrinin dövriyyəsi 2010-cu ilin yanvar-avqust ayları ilə müqayisədə 20% artaraq 320,6 mln. manata bərabər olub. «Hesabat dövründə iaşə dövriyyəsi üzrə real artımın 32,4%-i hüquqi şəxs statuslu müəssisələr, 67,6%-i hüquqi şəxs yaratmadan sahibkarlıq fəaliyyəti göstərən fərdi sahibkarların iaşə müəssisələrində yaranıb. Hüquqi şəxs statuslu müəssisələrdə iaşə dövriyyəsinin həcmi əvvəlki ilin eyni dövrünün səviyyəsini 11,8% üstələyərək 164,4 mln. manata çatıb», - deyə Komitədən bildirilib.