Sahibkarlıq

Sahibkarlıq

Rabitə və telekommunikasiya sahəsində restrukturizasiya və özəlləşdirmə mövzusunda seminar keçirilib

29 sentyabr 2011 09:29 (UTC +04:00)

Bakı - APA-Economics. Bu gün Bakıda Əmlak Məsələləri Dövlət Komitəsinin təşkilatçılığı ilə “Rabitə və telekommunikasiya sahəsində restrukturizasiya və özəlləşdirmə - Almaniya təcrübəsi” mövzusunda seminar keçirilib.

“APA-Economics”in xəbərinə görə, tədbir komitənin Almaniyanın federal dövlət əmlakının özəlləşdirilməsinə məsul qurumu ilə birgə Almaniya Beynəlxalq Əməkdaşlıq Cəmiyyətinin (GİZ) əməkdaşlığı çərçivəsində təşkil edilib.

Seminarda Komitənin mərkəzi aparatının və strukturuna daxil olan qurumların əməkdaşları, eləcə də GİZ-in layihə rəhbəri Vulf Şimider və almaniyalı ekspert Kristof Drayer iştirak ediblər. Xarici ekspertlər Avropa ölkələrində, o cümlədən Almaniyada rabitə və telekommunikasiya sferasında həyata keçirilən islahatlar barədə ətraflı məlumat veriblər. Ekspertlər bu islahatlar çərçivəsində rabitə və telekommunikasiya sahəsində fəaliyyət göstərən şirkətlərin restrukturizasiyası və səhmlərinin özəlləşdirilməsi təcrübəsi ilə bölüşüblər. Bu istiqamətdə həyata keçirilən tədbirlərin, bu sahənin inkişafına iri həcmli investisiyaların cəlb edilməsinə, göstərilən xidmətlərin keyfiyyətinin yüksəldilməsinə şərait yaratması mexanizmləri şərh edilib. Bununla yanaşı, özəlləşdirmə prosesinin müəssisələrin, işçilərin və investorların maraqlarının nəzərə alınmaqla təşkili qaydaları açıqlanıb.

Seminarda rabitə müəssisələrinin restrukturizasiyası və özəlləşdirilməsinə dair Avropa ölkələrində, o cümlədən Almaniyada toplanılmış təcrübənin Azərbaycanda tətbiqi imkanları barədə fikir mübadiləsi aparılıb. Sonda iştirakçılara sertifikatlar verilib.