Sahibkarlıq

Sahibkarlıq

Şahin Mustafayev: “Bu ilin ilk 6 ayı ərzində Azərbaycanda 28 milyard dollar dəyərində ümumi daxili məhsul istehsal olunub”

08 oktyabr 2011 10:28 (UTC +04:00)

Sumqayıt. Nicat Mustafayev - APA-ECONOMICS. Bu gün İqtisadi İnkişaf Nazirliyinin (İİN) təşkilatçılığı ilə Sumqayıt Texnologiyalar Parkında Azərbaycanda fəaliyyət göstərən istehsalçı müəssisələr və potensial alıcılar arasında görüş keçirilib. “APA-ECONOMİCS”-in məlumatına görə, tədbirdə dövlət qurumlarının, iri istehsalçı şirkətlərin 150-dək nümayəndəsi iştirak edib.

Tədbirdə çıxış edən iqtisadi inkişaf naziri Şahin Mustafayev ölkənin iqtisadi inkişafından danışıb. O bildirib ki, cari ilin yanvar-avqust ayları ərzində ölkənin neft sektorunda 8,5 faiz artım olub: “Bu dövrdə xarici ticarət dövriyyəsinin həcmi 32 faiz artaraq 24 milyard dollar təşkil edib. Qeyri-neft sektoru üzrə ixracın həcmi ötən ilin eyni dövrü ilə müqayisədə 12 faiz artıb”.

Nazir deyib ki, bu gün Azərbaycanda istehsal edilən qeyri-neft məhsulları, o cümlədən elektrik maşınları və avadanlıqları, onların hissələri, kimya sənayesi məhsulları, tikinti materialları, hazır toxuculuq məmulatları və s. müxtəlif bölgələrə ixrac edilir. Onun sözlərinə görə, 8 ay ərzində ölkədə qida məhsullarının istehsalı 7 faiz, toxuculuq məhsullarının istehsalı 14,7 faiz, geyim məhsullarının istehsalı 60 faiz, kompüter avadanlıqlarının istehsalı 20,6 faiz, elektron məhsulların istehsalı isə 25,4 faiz artıb: “Bu da ölkədə qeyri-neft sektorunun inkişafından xəbər verir”.

Ş. Mustafayev bildirib ki, 6 ay ərzində Azərbaycanda 28 milyard dollarlıq Ümumi Daxili Məhsul istehsal olunub. Bu göstərici Gürcüstanda 3,5 milyard dollar, Ermənistanda isə 2,2 milyard dollar təşkil edib.

Tədbirin rəsmi hissəsi başa çatdıqdan sonra Azərbaycanda fəaliyyət göstərən istehsalçı müəssisələr və potensial alıcılar arasında görüş keçirilib.