Sahibkarlıq

Ana səhifə

Sahibkarlıq

Azərbaycanın iri şirkətləri üçün beynəlxalq ticarət qaydaları ilə bağlı seminar keçirilir

13 oktyabr 2011 08:10 (UTC +04:00)

Bakı. Vahab Rzayev – APA-Economics. Bu gün Bakıda Azərbaycanda İxracın və İnvestisiyaların Təşviqi Fondu (AZPROMO) tərəfindən ölkədə fəaliyyət göstərən yerli iri şirkətlərin nümayəndələri üçün «Qeyri-neft sektorunda fəaliyyət göstərən sahibkarların maarifləndirilməsi»nə dair seminar işə başlayıb. «APA-Economics»in məlumatına görə, seminarda 30-a yaxın iri şirkət və holdinqin nümayəndələri iştirak edirlər.

Azpromo-nun prezidenti Adil Məmmədov bildirib ki, seminarın mövzusu Beynəlxalq Ticarət Palatası tərəfindən hazırlanmış «Incoterms-2010» xarici ticarət qaydalarına həsr olunub. A.Məmmədovun sözlərinə görə, artıq Azərbaycanın qeyri-neft sektorunda çalışan bir sıra iri şirkətlər öz məhsullarını ixrac edir və bu səbəbdən beynəlxalq ticarət qaydalarında baş verən dəyişikliklər onlara çatdırılmalıdır. Xatırladaq ki, xarici ticarətdə istifadə olunan əsas termin və anlayışı cəmləşdirən «Incoterms» (International Commerce Terms) qaydaları Beynəlxalq Ticarət Palatası tərəfindən dərc edilir və 2010-cu ildə onların sonuncu redaksiyası dərc olunub. Bundan əvvəl qaydalar 2000-ci ildə hazırlanıb və son illər ərzində beynəlxalq ticarətdə baş verən proseslər qaydalara dəyişikliklərin edilməsini şərtləndirib.

A.Məmmədov bəyan edib ki, yerli şirkətlərin ixrac əməliyyatlarında problemlərin aradan qaldırılması, müqavilələrin beynəlxalq standartlara uyğun hazırlanması və digər məsələlərin həlli üçün Azpromo belə maarifləndirmə seminarların keçirilməsini zəruri hesab edir. Qaydalarla bağlı iş adamlarına ətraflı məlumatın verilməsi üçün seminara «Isgandarov & Partners» konsaltinq şirkətinin rəhbəri Kamran İsgəndərov dəvət olunub. K.İsgəndərov «Incoterms-2010» xarici ticarət qaydaları barədə ətraflı təqdimatla çıxış edib.

Qeyd edək ki, seminarda həmçinin xarici ticarətdə satıcı və alıcının öhdəlikləri, risklərin paylaşdırılması, daşınma və sığorta, xərclərin bölüşdürülməsi, daşınma sənədləri və çatdırılmanın təsdiq edilməsi, yoxlama, qablaşdırma, markalanma, bütün növ nəqliyyat üçün qaydalar, dəniz və daxili sular nəqliyyatı üçün qaydalar kimi mövzular müzakirə olunur.

Seminar iki gün davam edəcək.