Sahibkarlıq

Ana səhifə

Sahibkarlıq

Almaniyada tədris və təcrübə keçmiş gənc azərbaycanlı menecerlərin ixtisasartırma kursunun səmərəliliyi qiymətləndirilib

14 oktyabr 2011 13:35 (UTC +04:00)

Bakı. Nicat Mustafayev - APA-Economics. Bu gün Azərbaycan İqtisadi İnkişaf Nazirliyinin təşkilatçılığı ilə 2010-cu ilin iyun-iyul aylarında Karl-Dyusberq Tədris Mərkəzində (Almaniya) tədris və təcrübə keçmiş 20 gənc azərbaycanlı menecerin ixtisasartırma kursunun səmərəliliyinin qiymətləndirilməsinə həsr olunmuş seminar keçirilib.

Nazirlikdən «APA-Economics»ə verilən məlumata görə, tədbirdə İqtisadi İnkişaf Nazirliyinin, Almaniyanın GİZ təşkilatının və Karl-Dyusberq Tədris Mərkəzinin nümayəndələri, həmçinin müxtəlif illərdə Almaniyada ixtisasartırma kursu keçmiş 30-dan çox sahibkar və gənc menecer iştirak edib.

Seminarda çıxış edən İqtisadi İnkişaf Nazirliyinin nümayəndələri maarifləndirmə tədbirlərinin sahibkarlıq fəaliyyətinin səmərəli təşkilində rolundan bəhs edib, Almaniyada təşkil edilmiş ixtisasartırma kurslarının əhəmiyyəti barədə məlumat verib, bu proqramın gələcəkdə də davam etdirilməsinin Azərbaycan gənclərinin menecment sahəsində beynəlxalq təcrübəyə yiyələnməsi, iş adamları arasında işgüzar əlaqələrin genişlənməsi baxımından əhəmiyyətini vurğulayıblar.

Tədbirdə qeyd olunub ki, «Azərbaycanda biznesin idarə olunması sahəsində kadrların ixtisasının artırılması üzrə Almaniya-Azərbaycan ikitərəfli Proqramı»na əsasən Azərbaycanın özəl sektorunda biznesin idarə olunması sahəsində fəaliyyət göstərən kadrların Almaniyada tədris və təcrübə keçməsi təşkil edilir. Seminarda bu cür tədbirlərin həyata keçirilməsi sahibkarlıq fəaliyyətinin səmərəli təşkilində menecerlərin bilik və təcrübə səviyyəsinin yüksəldilməsində əhəmiyyəti qeyd edib.

Xatırladaq ki, 2011-ci ilin noyabrın 1-dən 30-dək 25 sahibkarın və gənc menecerlərin Almaniyanın Menecment Akademiyasına ixtisasartırma kurslarına göndərilməsi nəzərdə tutulur. Proqramın fəaliyyət müddəti ərzində iqtisadiyyatın müxtəlif sahələrində fəaliyyət göstərən 64 sahibkar və gənc menecer Karl-Dyusberq, Baden-Vüttenberq və digər tədris mərkəzlərində tədris, Berlin və Bonn şəhərlərində müvafiq sahələr üzrə müəssisələrdə təcrübə kursları keçib.