Sahibkarlıq

Sahibkarlıq

Bakıda Azərbaycan-Bavariya biznes-forumu keçirilib - FOTOSESSİYA

Bakıda Azərbaycan-Bavariya biznes-forumu keçirilib - <font color=red>FOTOSESSİYA</font>

19 oktyabr 2011 12:49 (UTC +04:00)

Bakı. Elnur Hüseynquluyev - APA-Economics. Bu gün Bakıda İqtisadi İnkişaf Nazirliyinin dəstəyi, Azərbaycanda İxracın və İnvestisiyaların Təşviqi Fondunun (AZPROMO) və Almaniya-Azərbaycan İqtisadi Birliyinin (DAWF) təşkilatçılığı ilə Azərbaycan-Bavariya biznes-forumu keçirilib.

«APA-Economics»in məlumatına görə, tədbirdə inşaat və infrastruktur, energetika, logistika, tibbi texnologiyalar, ətraf mühit İKT, yüngül sənaye və digər sektorlarda fəaliyyət göstərən 20 alman şirkətinin nümayəndəsi iştirak edib. Azərbaycan tərəfdən isə biznes-forumda analoji sahələrdə fəaliyyət göstərən 80-dən çox iş adamı iştirak edib.

Tədbiri giriş sözü ilə açan Azərbaycanın ekologiya və təbii sərvətlər nazirinin müavini Firdovsi Əliyev və Bavariyanın İqtisadiyyat, İnfrastruktur, Nəqliyyat və Texnologiyalar Nazirliyinin beynəlxalq ticarət idarəsinin rəisi Ulkire Volf çıxış edərək, iş adamları arasında əməkdaşlığın genişlənməsində biznes-forum, konfrans və işgüzar görüşlərin əhəmiyyətini vurğulayıblar.

Almaniyanın Azərbaycandakı səfiri Herbert Quelle isə çıxışında iki ölkə arasındakı mövcud iqtisadi əlaqələrdən danışıb, bu əlaqələrin gələcəkdə də uğurla davam etdiriləcəyini bildirib. Səfir 2019-cu ildə Almanların Azərbaycana gəlişinin 200 illiyi münasibəti ilə Göy-Göldə möhtəşəm tədbirin keçiriləcəyini də bildirib.

Tədbirdə Azərbaycan İqtisadi İnkişaf Nazirliyinin sahibkarlığın inkişafı siyasəti şöbəsinin müdiri Zaur Qasımov ölkə müstəqillik əldə etdikdən indiyədək Azərbaycana 100 mlrd. ABŞ dolları həcmində investisiya yatırıldığını bildirib: «Bu investisiyalarda xarici sərmayələrin payı təxminən 50% təşkil edib. İnvestisiyaların adambaşına düşə payına görə Azərbaycan MDB-də lider dövlət olaraq qalır».

Z.Qasımov daha sonra Azərbaycanla Almaniya arasında iqtisadi əlaqələrdən danışaraq bildirib ki, bu ilin yanvar-sentyabr aylarında Almaniya ilə Azərbaycan arasında ticarət dövriyyəsinin 804 mln. ABŞ dolları həcmində olub. Ümumi ticarət dövriyyəsinin 650 mln. manatı idxalın, qalanı isə ixracın payına düşüb.

Qeyd edək ki, forum Azərbaycan və Almaniya iş adamları arasında iki tərəfli görüşlərlə davam edib.