Sahibkarlıq

Sahibkarlıq

Avropa İttifaqı “Şərq Tərəfdaşlığı” ölkələrində kiçik və orta biznesin inkişafına əlavə 5 mln. dollar ayırıb

21 oktyabr 2011 15:00 (UTC +04:00)

“APA-Economics”in xəbərinə görə, bu barədə bu gün Bakıda bununla bağlı keçirilən təqdimat mərasimində bildirilib.

Bununla da Aİ tərəfindən “Şərq Tərəfdaşlığı” ölkələrində TAM (TurnAround Management) və BAS (Business Advisory Service) layihələrinin maliyyələşdirilməsinin ümumi məbləği 2010-2013-cü illərdə 10 mln. avro təşkil edəcək.

Tədbirdə çıxış edən Avropa Yenidənqurma və İnkişaf Bankının (AYİB) Azərbaycandakı nümayəndəliyinin rəhbəri Frensis Deley bildirib ki, TAM və BAS proqramları həm Azərbaycanda, həm də digər “Şərq Tərəfdaşlığı” ölkələrində kiçik biznesin dəstəklənməsində mühüm rol oynayır. Onun sözlərinə görə, AYİB bu günədək özəl sektora 6 mln. dollar vəsait qoyub, həmçinin məsləhət xidmətləri göstərir: “AYİB bu günədək Azərbaycanda 27 investisiya proqramı həyata keçirib”.

Aİ-nin Azərbaycandakı nümayəndəliyinin əməkdaşı Ovidio Naftanail qeyd edib ki, Aİ iqtisadiyyat və sahibkarlıq sahəsindəki bilik və təcrübəsini tərəfdaş ölkələrlə bölüşməyə hazırdır: “Bu layihələrin maliyyələşdirilməsinə Azərbaycan iqtisadiyyatının diversifikasiyası imkanı kimi də baxmaq olar”.

Qeyd edək ki, ABS proqramı Azərbaycanda 2003-cü ildən həyata keçirilir. Donorların BAS proqramına ayırdığı 4,5 mln. avro vəsait hesabına 615 layihə həyata keçirilib. Bu ilin aprel ayından gələn ilin mart ayınadək proqram çərçivəsində Azərbaycanda 60 layihə həyata keçirmək planlaşdırılır. Onların maliyyələşdirilməsinin həcmi 300 min dollar təşkil edəcək.