Sahibkarlıq

Ana səhifə

Sahibkarlıq

Azərbaycanda vətəndaşlar vergidən yayınma halları barədə Vergilər Nazirliyinə məlumat verməyə başlayıblar

25 oktyabr 2011 12:48 (UTC +04:00)

Bakı. Əli Əhmədov - APA-ECONOMICS. Bu ilin yanvar-sentyabr aylarında Vergilər Nazirliyinin telefon məlumat xidmətinə 189 mindən artıq müraciət daxil olub. «APA-ECONOMICS»in məlumatına görə, bu barədə xidmətin rəisi Məhəmməd Yunusov bildirib.

Onun sözlərinə görə, müraciətlərdən 91 mini canlı, qalanı isə avtomatik rejimdə cavablandırılıb. Canlı rejimdə əsasən vergi ödəyicilərindən daxil olan vergi hüquqpozmaları ilə bağlı müraciətlər qəbul olunur, qanunvericilik və nazirliyin elektron xidmətləri barədə suallar cavablandırılır. Günün pik vaxtlarında daxil olan zənglərin hamısını cavablandırmaq mümkün olmadığından, sonradan buraxılmış zənglərin gəldiyi nömrələrlə əks əlaqə yaradılaraq xidmət göstərilir.

Avtomatik cavablandırılan 98 min müraciətin 77 mini vergi ödəmələri barədə məlumat verilməsi olub. Qalan hallarda isə vergi ödəyiciləri öz VÖİN-lərini daxil edərək vergi borclarını öyrəniblər.

Bu ilin ilk 9 ayı ərzində telefon məlumat xidmətinə 417 şikayət daxil olub. Bunların böyük hissəsi, təqribən 300-də vətəndaşlar və sahibkarlar, digər vətəndaşların adi şəxslərin və ya sahibkarların vergidən yayınması barədə məlumat veriblər. Xidmətin rəisi M.Yunusovun sözlərinə görə, belə məlumatlara, məsələn, hansısa mağazada nəzarət-kassa aparatına çek vurulmadığı, hansısa sahibkarın öz işçiləri ilə əmək müqaviləsi bağlamadığı, eləcə də kiminsə öz evini kirayəyə verərkən vergidən yayınması və s. kimi məlumatlar aiddir. Xidmət rəisinin sözlərinə görə, ötən ilə nisbətən belə müraciətlərin sayı 2 dəfədən çox artıb. Xidmətdə bunu müraciətlərin vaxtında araşdırılması və tədbir görülməsi ilə bağlayırlar: «Müraciət edən şəxs də görür ki, onun müraciətinə qısa müddətdə baxılır və araşdırılır».

Qeyd edək ki, qaydalara əsasən, bu müraciətlərə 15 gün ərzində baxılmalıdır. Xidmətdə bildirirlər ki, şikayətin, o cümlədən vergidən yayınma ilə bağlı müraciətlərin araşdırılmasında şikayət edən vətəndaşın özü də iştirak edə bilər. Bəzi vətəndaşlar isə telefon məlumat xidmətinin imkanlarından sui-istifadə, yəni kiməsə şər atmaq məqsədilə istifadə edirlər: «Heç də bütün müraciətlər təsdiqini tapmır. Məsələn, kimsə müraciət edib ki, kimsə evini kirayəyə verib, amma sonra məlum olur ki, belə hal yoxdur və s.»