Sahibkarlıq

Ana səhifə

Sahibkarlıq

Azərbaycanda vergidən yayınan daha bir fiziki şəxs həbs olunub

28 oktyabr 2011 10:49 (UTC +04:00)

Bakı. Vahab Rzayev – APA-Economics. Azərbaycan Vergilər Nazirliyi yanında Vergi Auditi Departamenti (VAD) tərəfindən Bakı şəhəri Vergilər Departamentində (BŞVD) vergi ödəyiciləri kimi qeydiyyatda olan «Standart Lüks» MMC-də 2008-ci ilin avqustun 1-dən 2010-cu ilin mayın 1-dək olan dövr üzrə növbəti səyyar vergi yoxlaması aparılarkən 23 973 manat məbləğində ƏDV-nin, «Ultimate» MMC-də 2009-cu ilin sentyabrın 1-dən 2010-cu ilin iyunun 1-dək olan dövr üzrə səyyar vergi yoxlaması aparılarkən isə 8 032 manat məbləğində ƏDV-nin dövlət büdcəsindən yayındırılması müəyyən olunub. «APA-Economics»in xəbər verdiyi kimi, bu barədə Vergilər Nazirliyinin rəsmi məlumatında deyilir.

Məlumata əsasən, hər iki faktla bağlı Vergi cinayətlərinin ibtidai araşdırılması Departamentinin (VCİAD) İstintaq İdarəsi tərəfindən Cinayət Məcəlləsinin 213.1-ci maddəsi ilə cinayət işi başlanıb. Cinayət işlərinin istintaqı zamanı müəyyən edilib ki, Həsənov Vahid Həsənağa oğlu «Standart Lüks» MMC-nin faktiki və «Ultimate» MMC-nin rəsmi direktoru olaraq həmin müəssisələrin adından müxtəlif əməliyyatlar həyata keçirib.
Bundan başqa, VAD tərəfindən «Texniki Təchizat TT» MMC-də 2009-cu ilin yanvarın 1-dən 2010-cu ilin avqustun 1-dək olan dövr üzrə səyyar vergi yoxlaması aparılarkən 159 567 manat məbləğində ƏDV-nin büdcədən yayındırıldığı və xüsusi razılıq (lisenziya) almadan neft məhsullarının alqı-satqısı nəticəsində 25 913 manat məbləğində gəlir əldə edildiyi müəyyən olunub.

VCİAD tərəfindən aparılan cinayət işlərinin istintaqı zamanı müəyyən edilib ki, Abşeron rayonunun Fatmayi kənd sakini, əvvəllər CM-nin 213.4-cü maddəsi ilə məhkum olunmuş Həsənov Vahid Həsənağa oğlu «Ultimate» MMC-nin direktoru olarkən 7 585 manat, «Texniki Təchizat TT» MMC-nin faktiki rəhbəri olarkən 147 599 manat, «Standart Lüks» MMC-nin faktiki rəhbəri olarkən isə 23 973 manat məbləğində ƏDV-ni mühasibat sənədlərinə gəlirlər və xərclər barədə bilə-bilə təhrif olunmuş məlumatlar daxil etməklə dövlət büdcəsindən yayındırıb. Bundan başqa V.Həsənov «Texniki Təchizat TT» MMC-nin və «Standart Lüks» MMC-nin adından neft məhsullarının satışını xüsusi razılıq (lisenziya) almadan həyata keçirib və bununla da qanunsuz sahibkarlıq fəaliyyəti ilə məşğul olaraq 27 227 manat məbləğində gəlir əldə edib.

Nəticədə, V.Həsənova CM-nin 192.2.2 (qanunsuz sahibkarlıq), 213.1 və 213.2.2-ci (aksiz markası ilə markalanmalı olan məhsulları belə marka olmadan satma, satış məqsədi ilə saxlama, istehsal binasının hüdudlarından kənara çıxarma və ya idxal etmə) maddələri üzrə ittiham elan edilib, Xətai rayon Məhkəməsinin qərarı ilə onun barəsində həbs qətimkan tədbiri seçilib. Nazirliyin məlumatında deyilir ki, təqsirləndirilən şəxs qismində cəlb edilmiş V.Həsənov özünü ona elan edilmiş ittihamda təqsirli sayıb.