Sahibkarlıq

Sahibkarlıq

Aran iqtisadi rayonu üzrə «Regionlarda sahibkarlığın inkişafına dövlət dəstəyi» mövzusunda tədbir keçirilib

28 oktyabr 2011 13:47 (UTC +04:00)

Bakı. Nicat Mustafayev – APA-Economics. Bu gün Azərbaycan İqtisadi İnkişaf Nazirliyinin Sahibkarlığa Kömək Milli Fondu (SKMF) Saatlı rayonunun Qıraqlı kəndində «Regionlarda sahibkarlığın inkişafına dövlət dəstəyi» mövzusunda tədbir keçirib. Nazirlikdən «APA-Economics»ə verilən məlumata görə, tədbirdə Aran iqtisadi rayonunda fəaliyyət göstərən 100-dək sahibkar iştirak edib.

Tədbirdə çıxış edən İqtisadi İnkişaf Nazirliyi sahibkarlığın inkişafı siyasəti şöbəsinin müdir müavini Elçin İbrahimov ölkədə qeyri-neft sektorunun inkişafının sürətləndiyini, regionlarda sahibkarlığın inkişafına dövlət dəstəyinin sistemli şəkildə həyata keçirilməsi nəticəsində iqtisadiyyatda özəl bölmənin rolunun daha da artdığını vurğulayıb.

İqtisadi İnkişaf Nazirliyinin Aran regional bölməsinin müdiri Elbrus Hüseynov isə icrası uğurla davam etdirilən dövlət proqramlarında nəzərdə tutulmuş tədbirlərin həyata keçirilməsi istiqamətində iqtisadi regionda görülmüş və görüləcək işlər barədə məlumat verib.

Öz növbəsində SKMF-ın icraçı direktoru Şirzad Abdullayev qeyd edib ki, 2011-ci ilin ötən dövrü ərzində müvəkkil kredit təşkilatları vasitəsilə ölkə üzrə sahibkarlıq subyektlərinin 1 404 investisiya layihəsinin maliyyələşdirilməsinə 120,3 mln. manat, o cümlədən yeni texnologiyaların tətbiqinə əsaslanan 71 böyük və iri həcmli investisiya layihəsinin (8 müasir çörək istehsalının, 13 soyuducu anbar kompleksinin, 1 taxıl anbarı kompleksinin, südlük istiqamətli 3 cins heyvandarlıq kompleksinin, 10 müasir istixana kompleksinin, 2 süd emalı müəssisəsinin, 12 quşçuluq təsərrüfatının, 3 ət emalı (kəsim sexi) müəssisəsinin, 3 meyvə-tərəvəz emalı, 1 quru meyvə istehsalı, 1 tikinti materiallarının istehsalı, 6 kənd təsərrüfatı məhsulları istehsalı (intensiv bağçılıq), 3 turizm müəssisəsinin, 1 qida yağlarının istehsalı müəssisəsinin, 1 kağız və karton istehsalı müəssisəsinin, 1 mebel istehsalı müəssisəsinin, 1 şokolad istehsalı müəssisəsinin və 1 parça istehsalı müəssisəsinin) maliyyələşdirilməsinə 101,6 mln. manat və 1 333 digər investisiya layihəsinin maliyyələşdirilməsinə 18,7 mln. manat güzəştli kredit verib.
Maliyyələşdirilən investisiya layihələrinin reallaşması nəticəsində 5 500-ə yaxın yeni iş yerlərinin açılması nəzərdə tutulub.

Ş.Abdullayev onu da bildirib ki, Aran iqtisadi rayonu üzrə 2011-ci ilin ötən dövrü ərzində SKMF-ın vəsaitləri hesabına müvəkkil kredit təşkilatları vasitəsilə sahibkarlıq subyektlərinin 589 investisiya layihəsinin maliyyələşdirilməsinə 35,8 mln. manat, o cümlədən yeni texnologiyaların tətbiqinə əsaslanan 19 böyük və iri həcmli investisiya layihəsinin (1 müasir çörək istehsalı müəssisəsinin, 3 soyuducu anbar kompleksinin, südlük istiqamətli 2 cins heyvandarlıq kompleksinin, 1 müasir istixana kompleksinin, 1 süd emalı müəssisəsinin, 6 quşçuluq təsərrüfatının, 2 ət emalı (kəsim sexi), 1 tikinti materiallarının istehsalı və 2 kənd təsərrüfatı məhsulları istehsalı (intensiv bağçılıq) müəssisəsinin) maliyyələşdirilməsinə 29,3 mln. manat və 550 digər investisiya layihəsinin maliyyələşdirilməsinə 6,5 mln. manat güzəştli kredit verib. Bu kreditlər hesabına 1 700-dən çox yeni iş yerinin yaradılması nəzərdə tutulur.

Tədbir çərçivəsində Saatlı rayonunun mövcud iqtisadi potensialının reallaşdırılması istiqamətində iş adamlarının təklif və ehtiyacları nəzərə alınmaqla kiçik və orta həcmli emal müəssisələrinin yaradılması məqsədi ilə sahibkarlarla müzakirələr aparılıb. İş adamlarına Fondun vəsaitləri hesabına güzəştli kreditlərin verilməsi mexanizmi izah olunub, o cümlədən investisiya layihələrinin hazırlanması və təqdim olunmasına dair maarifləndirici treninq keçirilib.

Tədbir çərçivəsində müvəkkil kredit təşkilatları vasitəsilə Saatlı və ətraf rayonlarda fəaliyyət göstərən 32 sahibkarlıq subyektinə 395 min manat güzəştli kredit vəsaiti verilib ki, bu kreditlər hesabına 50-yə yaxın yeni iş yerinin yaradılması nəzərdə tutulur.