Sahibkarlıq

Ana səhifə

Sahibkarlıq

Cəlilabad rayonunun Qarazəncir kəndində “Regionlarda sahibkarlığın inkişafına dövlət dəstəyi” mövzusunda tədbir keçirilib

04 noyabr 2011 12:57 (UTC +04:00)

Bakı - APA-Economics. İqtisadi İnkişaf Nazirliyinin Sahibkarlığa Kömək Milli Fondu “Regionlarda sahibkarlığın inkişafına dövlət dəstəyi” mövzusunda növbəti tədbirini noyabrın 4-də Cəlilabad rayonunun Qarazəncir kəndində keçirib. Nazirlikdən “APA-Economics”ə verilən məlumata görə, tədbirdə 100-ə yaxın fermer iştirak etmişdir.

Tədbirdən əvvəl əsas hissəsi Sahibkarlığa Kömək Milli Fondunun vəsaitləri hesabına maliyyələşdirilmiş Cəlilabad şəhərində “Cavid-Ş” MMC-nin tutumu 2 min ton olan müasir soyuducu və “Avanqard” MMC-nin tutumu 10 min ton olan taxıl anbarı komplekslərinin fəaliyyətinə baxış keçirilmişdir.

Sonra “Regionlarda sahibkarlığın inkişafına dövlət dəstəyi” öz işinə başlayıb. Əvvəlcə sahibkarlar üçün maarifləndirici treninq keçirilib, güzəştli kreditlərin verilməsi mexanizmi izah olunub, o cümlədən investisiya layihələrinin hazırlanması və təqdim olunması barədə məlumat verilib. Tədbirdə Fondun internet saytı barədə ətraflı məlumat verili, kreditlərin verilməsi qaydası barədə broşur və digər materiallar paylanıb.

Tədbiri giriş sözü ilə açan Cəlilabad Rayon İcra Hakimiyyətinin başçısı Əziz Əzizov iqtisadi sahədə Cəlilabad rayonunda görülən işlər, o cümlədən perspektivdə həyata keçiriləcək layihələr barədə tədbir iştirakçılarını məlumatlandırıb.

İqtisadi İnkişaf Nazirliyinin Sahibkarlığın inkişafı siyasəti şöbəsinin müdir müavini Elçin İbrahimov və Lənkəran regional bölməsinin müdiri Çingiz Məmmədov məqsədli dövlət proqramları çərçivəsində regionda görülən işlər, sahibkarlığın inkişafına dövlət dəstəyinin istiqamətləri və həyata keçirilən tədbirlər barədə çıxış ediblər.

Sahibkarlığa Kömək Milli Fondunun icraçı direktoru Şirzad Abdullayev Azərbaycan prezidentinin “Azərbaycan Respublikası Sahibkarlığa Kömək Milli Fondunun vəsaitlərinin istifadəsi mexanizminin təkmilləşdirilməsi haqqında” 13 oktyabr 2011-ci il tarixli fərmanı ilə Fondun Qaydalarında edilmiş dəyişikliklər, həmçinin güzəştli kreditlər hesabına Lənkəran iqtisadi rayonunda, o cümlədən Cəlilabad rayonunda həyata keçirilən layihələr barədə tədbir iştirakçılarına məlumat verib.

Qeyd edilib ki, Lənkəran iqtisadi rayonu üzrə sahibkarlıq subyektlərinin 91 investisiya layihəsinin maliyyələşdirilməsinə 3,5 mln. manat, o cümlədən yeni texnologiyaların tətbiqinə əsaslanan 4 investisiya layihəsinin maliyyələşdirilməsinə 2,4 mln. manat və 87 digər investisiya layihəsinin maliyyələşdirilməsinə 1,1 mln. manat güzəştli kredit verilib. Bu kreditlər hesabına 460-dan çox yeni iş yerinin yaradılması mümkün olacaq. Sonra sahibkarları maraqlandıran suallar cavablandırılıb.

Tədbirdə Cəlilabad rayonunun, o cümlədən Qarazəncir kəndinin iqtisadi potensialına uyğun olaraq, güzəştli kreditlər hesabına maliyyələşdirilməsi məqsədəuyğun hesab olunan dörd istiqamətdə - intensiv üzümçülük, kartofçuluq (və ya kartof toxumçuluğu) təsərrüfatlarının, kiçik və orta həcmli çiyələk emalı müəssisələrinin yaradılması və taxıl əkini üzrə nümunəvi investisiya layihələrinin təqdimatı keçirilib. Sahibkarların nəzərinə çatdırılıb ki, qeyd olunan sahələr üzrə nümunəvi investisiya layihələrinin Fondan əldə edə bilərlər və onların istəyinə uyğun olaraq layihələrin dəyərinin 100%-i güzəştli kredit hesabına maliyyələşdirilə bilər.

Tədbir çərçivəsində müvəkkil kredit təşkilatları vasitəsilə Cəlilabad və ətraf rayonlarda fəaliyyət göstərən 32 sahibkarlıq subyektinə 379 min manat güzəştli kredit vəsaiti verilmişdir. Bu kreditlər hesabına 50-dən çox yeni iş yerinin yaradılması nəzərdə tutulur. Ümumiyyətlə, 2011-ci ilin ötən dövrü ərzində Fondun vəsaitləri hesabına respublika üzrə sahibkarlıq subyektlərinin 1457 investisiya layihəsinin maliyyələşdirilməsinə 121,8 mln. manat güzəştli kredit verilib. Bu kreditlər hesabına icra olunan layihələrin reallaşması 5600-dən çox yeni iş yerinin yaradılmasına imkan verəcək.