Sahibkarlıq

Sahibkarlıq

Bu həftə Bakıda «ZARA» butiki açılacaq - ®

16 noyabr 2011 11:52 (UTC +04:00)

«APA-Economics»in məlumatına görə, «ZARA» dünyanın ən böyük pərakəndə dəb şirkətlərindən biri olan «Inditex»ə aiddir. Tədbirdə çıxış edən şirkətin regional baş icraçı direktoru Yasin Sibari (Yassine Sibari) qeyd edib ki, «ZARA» brendi Azərbaycan bazarında françayzinq əsasında fəaliyyət göstərəcək: «Yaxın Şərq və Şimali Afrika regionunda «Alhokair Fashion Retail» şirkəti lider mövqeyə malikdir və Azərbaycanda özünün yerli tərəfdaşı - «Retail Group Azerbaijan» şirkəti ilə (təsisçi – «ISR Holding») birlikdə «ZARA»nın françayzeridir».

Dünyada «ZARA» brendi nəyi təmsil etdiyini hər kəsə məlum olduğunu söyləyən Y.Sibari onu da bildirib ki, «ZARA»nın Azərbaycanda açılması geyim və dəb həvəskarları üçün bir bayrama çevriləcək: «Noyabrın 19-da Bakıda ilk «ZARA» dükanının rəsmi açılışı olacaq. Butik şəhərin mərkəzində yerləşən «Nərgiz» ticarət mərkəzində fəaliyyət göstərəcək. Bizim şirkətin siyasətinə əsasən və Bakıda istehlakçıların tələbatından asılı olaraq, biz növbəti 5 ildə Bakıda «ZARA» dükanlarının sayını 5-ə çatdırmaq niyyətindəyik. Tələbat daha çox olarsa, bu rəqəm dəyişə bilər».

Y.Sibari onu da bildirib ki, noyabrın 19-da «Nərgiz» ticarət mərkəzində həmçinin «Inditex Group»a daxil olan «Berşka» dükanın da açılışı olacaq: «Gələcəkdə biz «Inditex Group»a daxil olan digər brendləri də Azərbaycana gətirmək niyyətindəyik ki, bura «Massimo Dutti», «Oysho», «Stradivarius» brendləri daxildir».

«ZARA»da təklif olunan məhsulların qiymətlərinə gəldikdə Y.Sibari bildirib ki, «ZARA»nın qiymət strategiyasına əsasən, müxtəlif ölkələrdə təmsil olunan bu rnedin dükanları arasında ciddi qiymət fərqi yoxdur. Lakin müxtəlif ölkələrdəki gömrük, vergi, nəqliyyat məsrəfləri və s. kimi meyarlara görə qiymət dəyişə bilər: «Ümumiyyətlə, onu deyə bilərəm ki, Bakıda açılan «ZARA» butikində qiymətlər münasib və əlverişli olacaq və bütün yaş qrupları üzrə geyimlər təklif ediləcək. Digər brendlərdən fərqli olaraq «ZARA»nın kolleksiyası hər iki həftədən bir yenilənir».

Bakının müxtəlif yerlərində artıq «ZARA» brendinin qeyri-rəsmi təmsil olunmasına gəldikdə Y.Sibari qeyd edib ki, bu cür hallar «Inditex» şirkətinin xeyirinədir: «ZARA»nın rəsmən təmsil olunmayan ölkələrdə bəzi sahibkarlar bu brendin istehlakçılar tərəfindən səbirsizliklə gözlədiyini görərək sözügedən brendi qeyri-rəsmi şəkildə ölkədə təmsil edir. Lakin onu deyə bilərəm ki, bu cür dükanlarda istehlakçılara məhdud və köhnə kolleksiyalar təklif olunur. Eyni zamanda alıcılar belə dükanlarda çox vaxt istədikləri ölçüləri tapa bilmir. Bu səbəbdən «ZARA»nın Azərbaycanda rəsmi təmsil olunması bu cür məqamları aradan qaldıracaq. Sahibkarlar özləri hər şeyi başa düşüb dükanlarını bağlayacaqlar».

Tədbirin sonunda Y.Sibari onu da vurğulayıb ki, postsovet ölkələrində hazırda «ZARA» brendi Rusiya, Ukrayna, Baltikyanı ölkələr (subsidiar əsasında), Qazaxıstanda (françayzinq) təmsil olunur. Gələn il ərzində isə «ZARA» həmçinin Gürcüstanda fəaliyyətə başlayacaq.

Qeyd edək ki, Bakıda «ZARA» dükanı tamamilə yeni, «ZARA» mağazalarına xas beşinci nəsil dizayn konsepti əsasında tərtib olunub. Buradakı malların çeşidi, ehtiyatı, qiymətləri və dükanda olan xidmət səviyyəsi eynilə Avropa mağazalarında olduğu kimidir və brendin baş ofisi tərəfindən tənzimlənir.

Xatırladaq ki, 1975-ci ildə İspaniyanın Qalisiya bölgəsində açılan «ZARA» dünyanın ən məhsuldar pərakəndə dəb şirkətlərindən birinə çevrilib. Hər il «ZARA» 11 min unikal geyim istehsal edir. Yaxşı satılmayan mallar istehsaldan çıxarılır, satılanlar isə təkrarlanır.