Sahibkarlıq

Ana səhifə

Sahibkarlıq

Əmircan qəsəbəsində “Bakı qəsəbələrində sahibkarlığın inkişafına dövlət dəstəyi” mövzusunda tədbir keçirilib

18 noyabr 2011 07:58 (UTC +04:00)

Bakı. Elnur Hüseynquluyev - APA-Economics. Bu gün İqtisadi İnkişaf Nazirliyinin Sahibkarlığa Kömək Milli Fondu (SKMF) Suraxanı rayonunun Əmircan qəsəbəsində “Bakı qəsəbələrində sahibkarlığın inkişafına dövlət dəstəyi” mövzusunda növbəti tədbirini keçirib.

“APA-Economics”in xəbərinə görə, tədbirdə çıxış edən Suraxanı Rayon İcra Hakimiyyətinin başçısı İlqar Abbasov ölkənin bütün rayonlarında olduğu kimi, Bakı şəhərinin qəsəbələrində də sahibkarlıq fəaliyyətinin genişləndiyini, yeni istehsal və xidmət müəssisələrinin, sosial infrastruktur obyektlərinin yaradıldığını və əhalinin məşğulluq səviyyəsinin yüksəldiyini söyləyib.

SKMF-in icraçı direktoru Şirzad Abdullayev 2011-ci ilin ötən dövründə sahibkarlıq subyektlərinin 1473 investisiya layihəsinin maliyyələşdirilməsinə 122,7 mln. manat güzəştli kredit verildiyini, bu layihələrin reallaşdırılmasının 5700-dən çox yeni iş yerinin açılmasına imkan yaratdığını bildirib. O qeyd edib ki, ilin əvvəlindən indiyədək Bakı qəsəbələri üzrə sahibkarlıq subyektlərinin 192 investisiya layihəsinin maliyyələşdirilməsinə 30,6 mln. manat, o cümlədən yeni texnologiyaların tətbiqinə əsaslanan 23 investisiya layihəsinin maliyyələşdirilməsinə 2,2 mln. manat güzəştli kredit verilib. Bu kreditlər hesabına 1300-dən çox yeni iş yerinin yaradılması nəzərdə tutulur.

Tədbirdə Suraxanı rayonunun Əmircan qəsəbəsinin iqtisadi potensialına uyğun olaraq güzəştli kreditlər hesabına maliyyələşdirilməsi məqsədəuyğun hesab olunan, müasir tələblərə cavab verən ətlik istiqamətli quşçuluq təsərrüfatlarının, gündəlik istehsal gücü 5 ton olan müasir çörək istehsalı müəssisəsinin yaradılması üzrə nümunəvi investisiya layihələrinin təqdimatı keçirilib, müvəkkil kredit təşkilatları vasitəsilə Bakı qəsəbələrində fəaliyyət göstərən 19 sahibkarlıq subyektinə 810 min manat güzəştli kredit verilib. Bu kreditlər hesabına 90-a yaxın yeni iş yerinin yaradılması nəzərdə tutulur.