Sahibkarlıq

Ana səhifə

Sahibkarlıq

Qubada «Regionlarda sahibkarlığın inkişafına dövlət dəstəyi» mövzusunda tədbir keçirilib

25 noyabr 2011 12:57 (UTC +04:00)

Bakı. Nicat Mustafayev - APA-Economics. Bu gün Azərbaycan İqtisadi İnkişaf Nazirliyinin Sahibkarlığa Kömək Milli Fondu (SKMF) tərəfindən Qubanın Ağbil kəndində «Regionlarda sahibkarlığın inkişafına dövlət dəstəyi» mövzusunda tədbir keçirilib. Nazirlikdən «APA-Economics»ə verilən məlumata görə, tədbirdə 100-ə yaxın sahibkar iştirak edib.

Tədbirdə sahibkarlar üçün maarifləndirici treninq keçirilib, güzəştli kreditlərin verilməsi mexanizmi, investisiya layihələrinin hazırlanması və təqdim olunması barədə məlumat verilib, sahibkarlara güzəştli kreditlərin verilməsi qaydası barədə broşür və digər materiallar paylanıb.

Tədbirdə çıxış edən SKMF-nın icraçı direktoru Şirzad Abdullayev qeyd edib ki, 2011-ci ilin ötən dövrü ərzində Fondun vəsaitləri hesabına ölkə üzrə sahibkarlıq subyektlərinin 1 506 investisiya layihəsinin maliyyələşdirilməsinə 123,9 mln. manat güzəştli kredit verilib və bu layihələrin reallaşdırılması 5 700-dən çox yeni iş yerinin açılmasına imkan yaradır.

«Bu ilin ötən dövründə Quba-Xaçmaz iqtisadi rayonu üzrə sahibkarlıq subyektlərinin 97 investisiya layihəsinin maliyyələşdirilməsinə 12,8 mln. manat, o cümlədən yeni texnologiyaların tətbiqinə əsaslanan 7 investisiya layihəsinin maliyyələşdirilməsinə 11,5 mln. manat və 90 digər investisiya layihəsinin maliyyələşdirilməsinə 1,3 mln. manat güzəştli kredit verilib ki, bu kreditlər hesabına 360-dan çox yeni iş yerinin yaradılması nəzərdə tutulur», - deyə Ş.Abdullayev bildirib.

Tədbir çərçivəsində müvəkkil kredit təşkilatları vasitəsilə Quba və ətraf rayonlarda fəaliyyət göstərən 33 sahibkarlıq subyektinə 419 min manat güzəştli kredit vəsaiti verilib. Bu kreditlər hesabına 50-dən çox yeni iş yerinin yaradılması nəzərdə tutulur.