Sahibkarlıq

Ana səhifə

Sahibkarlıq

Azərbaycanda kassa aparatlarının onlayn qeydiyyatına başlanıb

28 noyabr 2011 15:10 (UTC +04:00)

Bakı. Əli Əhmədov - APA-Economics. Ötən həftədən etibarən Azərbaycanda sahibkarlıq subyektlərinin istifadə etdiyi nəzarət-kassa aparatlarının onlayn qeydiyyatına başlanıb. «APA-Economics»in məlumatına görə, bu barədə vergilər naziri Fazil Məmmədov məlumat verib.

«Mənim imzaladığım müvafiq əmrə əsasən noyabrın 22-dən kassa aparatlarının elektron qeydiyyatına başlanıb. Bu yenilik münasibətilə sahibkarları təbrik edirəm» - deyə nazir qeyd edib.

Bu dəyişikliklər nəticəsində kassa aparatlarının qeydiyyatı dəfələrlə asanlaşıb. Vergilər Nazirliyindən verilən məlumata görə, yeni dəyişikliklərə əsasən vergi ödəyicisi internet üzərindən nəzarət kassa aparatının (NKA) qeydiyyata alınması ilə bağlı ərizə məlumatlarını sistemə daxil edir və proqram tərəfindən avtomatik olaraq onların düzgünlüyü yoxlanılır. Bu halda hər hansı kənarlaşma olduqda, vergi ödəyicisinin ekranına müvafiq mesajlar verilir.

Ərizə məlumatlarında kənarlaşmalar olmadıqda, NKA qeydiyyata alınır və sistem tərəfindən NKA-nın plomblanması ilə bağlı operativ nəzarət strukturuna məlumat ötürülür. Həmin məlumat əsasında vergi əməkdaşı birbaşa NKA-nın quraşdırıldığı ünvana gedərək onun plomblanmasını həyata keçirir. Bundan sonra qeydiyyat vərəqi avtomatik vergi ödəyicisinin E-qutusuna göndərilir. NKA-nın qeydiyyat ərizəsinin servis texniki xidmət mərkəzləri (STXM) tərəfindən təqdim edilməsi və qeydiyyatı prosesinin daha da sadələşməsinə səbəb olub. Belə ki, NKA-nın qeydiyyatı ilə bağlı bütün işlər vergi ödəyicisi ilə müqavilə bağlamış STXM tərəfindən həyata keçirilir.

«Elektron qeydiyyat zamanı vergi ödəyicisi vergi orqanına gəlmir, qeydiyyat sənədlərinin düzgünlüyü insan faktoru olmadan sistem tərəfindən yoxlanılır ki, bu da vergi ödəyicisinin vaxta qənaət etməsinə şərait yaradır» - deyə nazirlikdən bildirilib.