Sahibkarlıq

Ana səhifə

Sahibkarlıq

“Bakı Quşçuluq” ASC-nin 56 səhmdarı paylarına düşən səhmləri tələb edir

12 dekabr 2011 13:40 (UTC +04:00)

Bakı. Azər Mustafayev - APA. “Bakı Quşçuluq” ASC-nin 56 səhmdarı bu gün mətbuat konfransı keçirib. APA-nın məlumatına görə, tədbir keçirən şəxslər hüquqlarının pozulduğunu, müəssisənin özəlləşdirilərək satılmasına baxmayaraq, onlara çatacaq payın rəhbərlik tərəfindən ayrılmadığını deyiblər.

Cəmiyyətin 56 səhmdarı adından çıxış edən Adil Mirzəyev bildirib ki, “Xəzər Menecment Sistems” MMC-nin sədri Dünyamin Xəlilov quşçuluq fabrikini alaraq 94% səhm payına sahib olub: ”Qalan 3%-i 56 fabrik işçisi, digər 3%-i fərdi şəxslər alıb. Fabrik rəhbərliyi ehtiyac olmadan müxtəlif təşkilatlardan külli miqdarda maliyyə vəsaiti alıb, lakin onları lazımi istiqamətə yönəltməyərək mənimsəyib. 2005-ci il yanvarın 1-nə olan məlumata görə, quşçuluq cəmiyyətinin ümumi dəyəri 2 791 187 manat vəsaiti olub, həmçinin buraya 779 368 manat məbləğində 107 adda maşın, traktor, avadanlıq və digər əsas vəsaitlər də aid olub. İşlək vəziyyətdə olan avadanlıqlar da daxil olmaqla hazırda fabrikdə 6,31 hektar sahədə yerləşən tikililər dağıdılaraq ümumi sahəsi 37,1 hektar torpaq sahəsi bir sotu 10 min manat olmaqla satışa çıxarılıb. Biz səhmdarlara deyilib ki, torpaq özəlləşdirilib, sizin də orda payınız var. 2011-ci il sentyabrın 30-da iclas keçirərək bizim iştirakımız olmadan cəmiyyəti ləğv ediblər. Bu işlərin arxasında Dünyamin Xəlilov, keçmiş direktor İlqar Əliyev və baş mühasib Elmira Həsənova dayanıb. Əsas məqsədimiz satışa çıxarılan torpaq sahəsinin ümumi məbləğinin 3%-nin 56 nəfər səhmdara verilməsidir. Səhm paylarımızın bizə qaytarılması və göstərilən şəxslərin bu qanunsuz hərəkətlərinin araşdırılması üçün ilk növbədə məhkəmələrə müraciət edəcəyik. Əgər bir nəticə verməsə, Avropa Məhkəmələrinə üz tutacağıq”.

Tədbir iştirakçıları bildiriblər ki, onların şikayətləri nəzərə alınmasa prezidentə bu barədə müraciət edəcəklər.

QSC-nin yeni təyin olunmuş direktoru Azər Əliyev isə APA-ya bildirib ki, səhmdarların hər birinə onların məlumatlandırılması üçün bildirişlər göndərilib: “Müəssisənin borcları ödənildikdən sonra səhmdarlara müəyyən miqdarda maliyyə vəsaiti veriləcək. Əlbəttə, bu onların dedikləri kimi ümumi məbləğin 3%-i qədər olmayacaq, çünki bu qədər pul bizdə yoxdur. Amma biz çalışırıq ki, hər bir səhmdar öz payını ala bilsin. Mən cəmiyyətin mülkünün dağıdılması ilə bağlı onların söylədiyi fikirlərlə də razı deyiləm”.