Sahibkarlıq

Ana səhifə

Sahibkarlıq

Bu il Bakı qəsəbələrində fəaliyyət göstərən sahibkarlara 35 mln. manat güzəştli kredit verilib

15 dekabr 2011 07:54 (UTC +04:00)

Bakı. Nicat Mustafayev - APA-Economics. İqtisadi İnkişaf Nazirliyinin (İİN) Sahibkarlığa Kömək Milli Fondu (SKMF) bu gün Xətai rayonunun Əhmədli qəsəbəsində “Bakı qəsəbələrində sahibkarlığın inkişafına dövlət dəstəyi” mövzusunda bu ilin sonuncu tədbirini keçirib.

“APA-Economics”in xəbərinə görə, tədbirdə 180-ə yaxın sahibkar iştirak edib. İİN-in Sahibkarlığın inkişafı siyasəti şöbəsinin müdiri Zaur Qasımov və Regionların inkişafı və dövlət proqramları şöbəsinin müdiri Sahib Məmmədov ölkə iqtisadiyyatının davamlı inkişaf etdiyini, sahibkarlıq fəaliyyətinin genişləndiyini bildirib, 2011-2012-ci illərdə Bakı şəhərinin və onun qəsəbələrinin sosial-iqtisadi inkişafına dair Dövlət Proqramına uyğun olaraq Bakı və onun qəsəbələrində görülən işlər barədə məlumat veriblər.

SKMF-in icraçı direktoru Şirzad Abdullayev 2011-ci ilin ötən dövründə sahibkarlıq subyektlərinin 1626 investisiya layihəsinin maliyyələşdirilməsinə 135,8 mln. manat güzəştli kreditin verildiyini, bu layihələrin reallaşdırılmasının 6300-ə yaxın yeni iş yerinin açılmasına imkan yaratdığını bildirib. O qeyd edib ki, bu ilin ötən dövrü ərzində Bakı qəsəbələri üzrə sahibkarlıq subyektlərinin 200-dən çox investisiya layihəsinin maliyyələşdirilməsinə 35 mln. manata yaxın, o cümlədən yeni texnologiyaların tətbiqinə əsaslanan 27 investisiya layihəsinin maliyyələşdirilməsinə 32,5 mln. manat və 180-dən çox digər investisiya layihələrinin maliyyələşdirilməsinə 2,5 mln. manat güzəştli kredit verilib. Bu kreditlər hesabına 1450-yə yaxın yeni iş yerinin yaradılması nəzərdə tutulub.

Ş.Abdullayev deyib ki, 2011-ci ilin ötən dövrü ərzində verilmiş güzəştli kreditlərin 25,8%-i Bakı qəsəbələrinin payına düşüb. Tədbir çərçivəsində müvəkkil kredit təşkilatları vasitəsilə Bakı qəsəbələrində fəal göstərən 21 sahibkarlıq subyektinə 5,4 mln. manat güzəştli kredit verilib ki, bu kreditlər hesabına 180-ə yaxın yeni iş yerinin yaradılması nəzərdə tutulur.