Sahibkarlıq

Ana səhifə

Sahibkarlıq

Bakıda «Azərbaycanda korporativ idarəetmə üzrə qiymətləndirici alətin işlənməsi» mövzusunda seminar keçirilib

21 dekabr 2011 08:51 (UTC +04:00)

Bakı. Nicat Mustafayev – APA-Economics. Bu gün Bakıda Azərbaycan İqtisadi İnkişaf Nazirliyi və Beynəlxalq Maliyyə Korporasiyasının (IFC) təşkilatçılığı ilə «Azərbaycanda korporativ idarəetmə üzrə qiymətləndirici alətin işlənməsi» mövzusunda seminar keçirilib. «APA-Economics»in məlumatına görə, tədbirdə beynəlxalq təşkilatlar, həmçinin IFC-nin nümayəndələri və 20-yə yaxın sahibkar iştirak edib.

Seminarda çıxış edən İqtisadi İnkişaf Nazirliyinin korporativ idarəetmə sektorunun müdiri Anar Hacızadə bildirib ki, bu ilin əvvəlində Nazirlik tərəfindən Azərbaycanda Korporativ İdarəetmə Standartları hazırlanıb və yerli şirkətlərə bu standartlar haqqında məlumat verilib: «Korporativ idarəetmə sahəsində görülən işlərin məntiqi davamı olaraq yerli şirkətlər tərəfindən Azərbaycanda Korporativ İdarəetmə Standartlarının tətbiqinin təşviqi və bu sahədə vəziyyətin öyrənilməsi məqsədilə aidiyyəti dövlət qurumları və beynəlxalq təşkilatlarla birgə «Azərbaycan şirkətlərində korporativ idarəetmənin təşkilinin qiymətləndirilməsi metodologiyası» (skorkart) hazırlanıb. Sənəd hazırlanarkən müvafiq qurumların və Qlobal Korporativ İdarəetmə Forumunun təklifləri nəzərə alınıb. Metodologiya İqtisadi Əməkdaşlıq və İnkişaf Təşkilatının Korporativ İdarəetmə Prinsipləri və Azərbaycanda Korporativ İdarəetmə Standartlarının əsasında hazırlanıb».

A.Hacızadə onu da qeyd edib ki, sənəddə şirkətlərdə korporativ idarəetmənin qiymətləndirilməsi üzrə meyarlar (korporativ idarəetmə prinsiplərinə əməl etmə, səhmdarların hüquqları, səhmdarlara eyni yanaşma, məlumatların açıqlanması və şəffaflıq və s.) və bu meyarların qiymətləndirilməsi metodu nəzərdə tutulur: «Qeyd edilən meyarlar əsasında tərtib edilən suallar bülleten formasında İqtisadi İnkişaf Nazirliyinin veb-səhifəsində yerləşdiriləcək. Şirkətlər könüllü şəkildə həmin bülletenlərdə göstərilən sualları cavablandırmaqla, elektron poçt vasitəsilə Nazirliyə təqdim edəcək. Son mərhələdə bu bülletenlər əsasında həmin şirkətlərdə korporativ idarəetmə vəziyyəti müəyyən ediləcək».

Tədbirdə çıxış edən Qlobal Korporativ İdarəetmə Forumunun Özəl Sektor üzrə Məsləhət Xidməti Qrupunun sədr müavini Kristian Strenger bildirib ki, skortkartdan istifadə qabaqcıl korporativ idarəetmə təcrübələrinin tətbiqinə bir çox ölkələr üçün mühüm rol oynayır: «Azərbaycanda skorkartın effektiv tətbiqi hökumətə və sahibkarlara ölkənin biznes mühitinin yaxşılaşdırılmasına kömək edəcək».

Qeyd edək ki, geniş məqsədli bu alət şirkətlərə, investorlara və tənzimləyici orqanlara Azərbaycanda korporativ idarəetmənin səviyyəsini və dəyişiklikləri sistematik qaydada qiymətləndirmək imkanını yaradacaq.

Xatırladaq ki, Azərbaycan 1995-ci ildən IFC ilə əməkdaşlıq edir. Cari ilin oktyabrın 1-nə olan məlumata əsasən, IFC Azərbaycana 139 mln. ABŞ dolları həcmində investisiya ayırıb. IFC-nin Azərbaycan Korporativ İdarəetmə Layihəsi İsveçrənin İqtisadi Məsələlər üzrə Dövlət Katibliyinin (SECO) maliyyə dəstəyi ilə həyata keçirilir.